కేసీఆర్ సర్కారు గోదావరి నది తెలంగాణలో ఎంటర్ అయిన దగ్గరినుంచి, తిరిగి ఆంధ్రప్రదేశ్లోకి ప్రవేశించే పాయింట్ వరకు కడుతున్న ప్రాజెక్టులన్నీ ఒక ఎత్తు, కృష్ణానది నీటిని వినియోగించుకోవడానికి ప్లాన్ చేస్తున్న పాలమూరు రంగారెడ్డి ప్రాజెక్టు ఒక్కటీ ఒక ఎత్తు. గోదావరి మీద కడుతున్న ప్రాజెక్టులు అన్నీ మిగులు జలాలకు వినియెగానికి సంబంధించినవి. వీటిని వీలైనంత ఎక్కువగా ఎవరు వినియోగించుకున్నప్పటికీ ఇబ్బంది లేదు. కానీ కృష్ణా జలాల విషయం అలా కాదు. ఈ పాలమూరు ప్రాజెక్టు పూర్తి అయితే రాయలసీమ జిల్లాలకు నీటి ఎద్దడి తప్పదనే బయాలు ఇప్పటికే విపరీతంగా వ్యాప్తి చెందుతున్నాయి. పీసీసీ అయితే ఏకంగా 13 జిల్లాల ఆంధ్రప్రదేశ్లో ఈ పాలమూరు ప్రాజెక్టు వలన 8 జిల్లాలు ఎడారిగా మారుతాయనే నినాదంతో పోరాటం ప్రారంభిస్తున్నది.
ఇలాంటి నేపథ్యంలో చంద్రబాబునాయుడు సర్కారు పాలమూరు ప్రాజెక్టును అడ్డుకోవడానికి ఎలాంటి కచ్చితమైన ప్రయత్నమూ చేయడం లేదని ప్రతిపక్షాల నుంచి విపరీతంగా ఆరోపణలు వస్తున్నాయి. ఈ ఆరోపణలను ప్రభుత్వం వారు కూడా సూటిగా ఖండించడం లేదు. మరోవైపు చంద్రబాబుతో తమకు పూర్తిస్థాయిలో సయోధ్యకుదిరిపోయినట్లుగా కేసీఆర్.. మాటలు ఉంటున్నాయి. చంద్రబాబు తాము ఏం చేసినా వ్యతిరేకించే అవకాశం లేదన్నట్లుగా ఆయన మాటల సంకేతాలు ఉంటున్నాయని జనం అనుకుంటున్నారు. ఈనేపథ్యంలో కేసీఆర్తో కుమ్మక్కు అయిన వ్యవహారంపై జనంలో ఇప్పటికే పలు సందేహాలున్నాయి. ముంపు గ్రామాలను తిరిగి ఇవ్వడానికి బాబు ఒప్పుకున్నారనే కేసీఆర్ మాట కూడా జనంలోకి బాగా వెళ్లింది.
అయితే ఆ మాటల్ని చంద్రబాబు ఖండించకపోవడం విశేషం. నీటి పారుదల మంత్రి దేవినేని ఉమా మాత్రమే ఖండించారు. అయితే ఆయన పాలమూరు ఎత్తిపోతల ప్రాజెక్టును అడ్డుకోవడం గురించి తమ ప్రభుత్వం ఏం చేస్తున్నదో చెప్పలేదు. ఆ ప్రాజెక్టు అనుమతులు లేకుండా కట్టడం అన్యాయం అక్రమం అంటూ ఆక్రోశిస్తున్నారే తప్ప.. ప్రభుత్వ పరంగా అడ్డుకోడానికి జరుగుతున్న ప్రయత్నాలేమిటో చెప్పడం లేదు. పైగా రైతులు కేసులు వేశారు.. అంటూ తాము చేసింది ఏమీ లేదని ఇండైరక్టుగా అంటున్నారు. సచివులు ఇలాంటి మాటలే చెబుతోంటే.. పాలమూరు ఎత్తిపోతలను అడ్డుకునే విషయంలో వారి చిత్త శుద్ధి మీద ప్రజలకు కొత్త డౌట్లు పుట్టుకొస్తాయి కదా అని పలువురు వ్యాఖ్యానిస్తున్నారు.
