ఆమె అంతే తెలంగాణ కాంగ్రెసు రాజకీయాల్లో ఆమె ప్రస్తుతానికి ఫైర్ బ్రాండ్. అధికార పార్టీని యథేచ్ఛగా విమర్శించాలంటే.. ఆమె తరువాతే ఎవరైనా. నోటికి ఎంత మాట వస్తే అంత మాట అనాలోచితంగా అనేయగలరు. ఒక రకంగా చెప్పాలంటే ఏపీ రాజకీయాల్లో రోజా ఎలాగైతే… తిట్లు లాంటి విమర్శలతో అధికార పార్టీకి గుబులు పుట్టిస్తూ ఉంటారో… ఇంచుమించుగా తెలంగాణ రాజకీయాల్లో ఆమె కూడా అంతే! తాను చేసిన వ్యాఖ్యల విషయంలో వెనక్కి తగ్గకపోవడంలో కూడా అంతే! ఆమె మరెవరో కాదు… కాంగ్రెసు మాజీ మంత్రి డీ కే అరుణ. ఇటీవల సభాపతి స్థానంలో ఉన్న పద్మా దేవేందర్ను సభలో అనుచితంగా మాట్లాడి వివాదాస్పదం అయిన డీకే అరుణ , కేసీఆర్ కేబినెట్ మంత్రిని ”జూలో పిల్లి” అని వ్యవహరించి మరో వివాదానికి తెర తీశారు.
తన సోదరుడు చిట్టెం రామ్మోహన రెడ్డి తెరాసలో చేరిన వ్యవహారానికి సంబంధించి ఆమె రెండు రోజులుగా కుతకుతలాడిపోతున్న సంగతి తెలిసిందే. ఆమె తాజాగా పాలమూరు రంగారెడ్డి ఎత్తిపోతల ప్రాజెక్టు మీద ఉద్యమం ప్రారంభించారు. ఈ ప్రాజెక్టు టెండర్లలో భారీగా అవతకవకలు జరిగాయని, వీటిని వెంటనే రద్దు చేయాలని ఆమె డిమాండ్ చేస్తున్నారు.
ఇదొక ఎత్తు అయితే సోదరుడు చిట్టెం పార్టీ మారడంపై ఆమె అసహనం గురించి మంత్రి జూపల్లి కృష్ణారావు ఖండించిన సంగతి తెలిసిందే. ఆ విషయాన్ని ఆమె ఎదుట ప్రస్తావించినప్పుడు.. జూపల్లి జూలో పిల్లి లాంటి వాడు.. అలాంటి వారి వ్యాఖ్యల గురించి నేనేమీ స్పందించను.. అని డీకే అరుణ తెగేసి చెప్పడం విశేషం. నా వ్యాఖ్యల గురించి ముఖ్యమంత్రి కేసీఆర్ స్పందిస్తే మాత్రమే నేను మాట్లాడతా అని ఆమె చెప్పడం విశేషం. డీకే అరుణ తనను తాను కాంగ్రెస్ ముఖ్యమంత్రి స్థాయి నాయకురాలిగా భావిస్తారు. ఆమె విమర్శల మీద మాట్లాడడం అంటే.. తెరాస ముఖ్యమంత్రి ఒక్కరే స్పందించాలన్నమాట.
