తెలుగుదేశం పార్టీ రాజధాని తరలింపును అడ్డుకోవాలని.. తమకు ఉన్న పరిమిత బలంతోనే తీవ్ర ప్రయత్నాలు చేయాలని భావిస్తోంది.కానీ ఇందుకు ఆ పార్టీ ఎమ్మెల్యేలు అంత సీరియస్గా లేరన్న విషయం టీడీఎల్పీ భేటీతో తేలిపోయింది. ఏకంగా ఏడుగురు ఎమ్మెల్యేలు టీడీఎల్పీ భేటీకి డుమ్మాకొట్టారు. వీరిలో ఇద్దరు వల్లభనేని వంశీ, మద్దాలి గిరి.. జగన్ను కలిసి.. తమ రూట్ సెపరేట్ అని చెప్పారు. మిగతా అందరూ..అయినా.. టీడీపీకి మద్దతుగా నిలుస్తారని అనుకుంటే.. ఎలాంటి వ్యూహం ఖరారు చేసుకోవాలనే దానిపై పెట్టుకున్న సమావేశానికి మరో ఐదుగురు డుమ్మా కొట్టారు. గంటా శ్రీనివాసరావు, వాసుపల్లి గణేష్, అనగాని సత్యప్రసాద్, బెందాళం అశోక్ , ఆదిరెడ్డి భవాని.. .. డుమ్మాకొట్టిన వారి జాబితాలో ఉన్నారు. వీరిలో గంటా , వాసుపల్లి, బెందాళం అశోక్ ఉత్తరాంధ్రకు చెందిన ఎమ్మెల్యేలు.
గంటా శ్రీనివాసరావు విశాఖ ఎగ్జిక్యూటివ్ రాజధానికి మద్దతు పలికారు. ఆయన టీడీపీలోఉంటానని ప్రకటనలు చేస్తున్నారు కానీ.. ఆ పార్టీ తరపున ఎలాంటి కార్యక్రమాల్లోనూ పాల్గొనడంలేదు. అయితే.. వీరందరూ.. వ్యక్తిగత పనుల వల్ల.. టీడీఎల్పీ సమావేశానికి రాలేకపోతున్నట్లుగా ముందుగానే సమాచారం పంపినట్లుగా.. తెలుగుదేశం పార్టీ వర్గాలు చెబుతున్నాయి. వీరంతా అసెంబ్లీకి హాజరవుతారని అంటున్నారు. అయితే.. వైఎస్ఆర్ కాంగ్రెస్ పార్టీ ప్రభుత్వం… రాజధాని తరలింపు అంశాన్ని చాలా సీరియస్గా తీసుకుంది. టీడీపీని మానసికంగా దెబ్బకొట్టడానికి అన్ని రకాల ప్రయత్నాలూ చేస్తోంది.
ఇలాంటి సమయంలో.. ఎమ్మెల్యేలు.. కీలకసమావేశాలు హాజరు కాకపోయినా అనుమానించాల్సిన పరిస్థితి ఏర్పడింది. అయితే.. గంటా తప్పా.. మిగిలిన నలుగురూ.. టీడీపీ తరపున గట్టిగా నిలబడిన వాళ్లే. వారిలో ఎర్రన్నాయుడు కుమార్తె కూడా ఉంది. కాబట్టి.. వారిని… అనుమానించాల్సిన పని లేదని… టీడీపీ నేతలు అంటున్నారు.
