ఏపీలో రేపు ఏం జరగబోతోంది? ప్రభుత్వం మూడు రాజధానులు బిల్లు ఎలా ప్రవేశపెట్టబోతోంది? ప్రధాన ప్రతిపక్షం టీడీపీ ఎలా అడ్డుకోబోతోంది? ప్రభుత్వ నిర్ణయం ఏవిధంగా ఉండబోతోంది?…ఇలాంటి ఉత్కంఠభరితమైన ప్రశ్నలు ఇప్పుడు సర్వత్రా టెన్షన్ పుట్టిస్తున్నాయి. ఒక్క మాటలో చెప్పాలంటే దేశమంతా ఏపీ వైపు చూస్తోంది. అసెంబ్లీలో అధికారపక్షమైన వైకాపాకు బండ మెజారిటీ ఉంది. అక్కడ ఎలాంటి ప్రాబ్లెం లేదు. శాసన మండలిలో టీడీపీకి మెజారిటీ ఉంది.
సహజంగానే అక్కడ ఇతర పక్షాలు టీడీపీకే బాసటగా ఉంటాయి. ఇదిలా ఉండగా ఈరోజు టీడీపీ అధినేత చంద్రబాబు నిర్వహించిన పార్టీ సమావేశానికి కొందరు ఎమ్మెల్యేలు, ఎమ్మెల్సీలు గైర్హాజరయ్యారు. ఐదుగురు ఎమ్మెల్యేలు, 12 మంది ఎమ్మెల్సీలు సమావేశానికి హాజరు కాలేదని వార్తలొచ్చాయి. మూడు రాజధానులును సమర్థిస్తున్న విశాఖ జిల్లా ఎమ్మెల్యేలు రాలేదు. వీరిలో కీలక ఎమ్మెల్యే గంటా శ్రీనివాసరావు. గైర్హాజరైన ఎమ్మెల్యేలు, ఎమ్మెల్సీలు వ్యక్తిగత కారణాలతో హాజరు కాలేకపోతున్నామని వర్తమానం పంపారు.
హిందూపురం ఎమ్మెల్యే, చంద్రబాబు బావమరిది కమ్ వియ్యంకుడు నందమూరి బాలకృష్ణ హాజరైనట్లుగా లేదు. టీడీపీ అనుకూల ఛానెల్ వార్తల్లో ఆయన కనబడలేదు. ఆయన గురించి ప్రస్తావన కూడా లేదు. ఈరోజు హాజరుకానివారంతా రేపు అసెంబ్లీకి, మండలికి తప్పకుండా హాజరవుతారని టీడీపీ నేతలు చెబుతున్నారు. ప్రజాప్రతినిధులందరికీ తప్పనిసరిగా హాజరుకావాలని పార్టీ విప్ జారీ చేసింది. జగన్కు మద్దతు ఇస్తూ టీడీపీకి దూరంగా ఉన్న ఇద్దరు ఎమ్మెల్యేలు వల్లభనేని వంశీ, గిరిధర్కు కూడా విప్ జారీ అయింది. విప్ జారీ అయ్యాక తప్పకుండా హాజరుకావల్సిందే.
రపు ఏపీ చరిత్రలోనే అత్యంత ముఖ్యమైన రోజు. చరిత్ర మలుపు తిరిగే రోజు. అయినప్పటికీ టీడీపీ ఎమ్మెల్యేలు, ఎమ్మెల్సీలు పార్టీ కీలక సమావేశానికి డుమ్మా కొట్టారు. అధినేత ఆదేశాన్ని ధిక్కరించారు. గైర్హాజరైన ప్రజాప్రతినిధులకు అమరావతిపై ఇంట్రెస్టు లేదా? అనే సందేహం కలుగుతోంది. టీడీపీకే కాదు, వ్యక్తిగతంగా కూడా చంద్రబాబుకు ఈ రోజు సమావేశం చాలా కీలకమైంది. అయినా చాలామంది తమ్ముళ్లు రాలేదంటే ఏమనుకోవాలి? టీడీపీకి బలం ఉన్నది మండలిలోనే. అక్కడ అధికార పార్టీకి కేవలం తొమ్మిదిమంది సభ్యులే ఉన్నారు. కాని మండలి సభ్యులే ఎక్కువమంది సమావేశానికి డుమ్మా కొట్టారు.
మూడు రాజధానులపై సీఎం జగన్ ఇప్పటికే బాబును ఇరికించేశారని కొందరు భావిస్తున్నారు. 2014లో చంద్రబాబు అనుసరించిన విధానాన్నే అనుసరించి దెబ్బ కొడతారని అనుకుంటున్నారు. అప్పట్లో చంద్రబాబు రాజధాని అమరావతిపై తనకు తానే నిర్ణయం తీసుకున్నారు. ఎవ్వరితోనూ చర్చించలేదు. అఖిలపక్ష సమావేశం పెట్టాలని కోరినా పట్టించుకోలేదు. అసెంబ్లీలోనే ప్రకటించి అమరావతిపై ఎస్ ఆర్ నో అనేది చెప్పాలని జగన్ను అడిగారు. చర్చ లేకుండా ప్రకటించాక తానేం చెప్పగలనని అన్న జగన్ గత్యంతరం లేక అమరావతికి అంగీకరించారు.
రేపు అదే విధానంలో జగన్, బాబును అభిప్రాయం అడుగుతారని, బాబు విశాఖకు నో అని నేరుగా చెప్పలేక వాకౌట్ (పార్టీ సభ్యులంతా) చేస్తారని అంటున్నారు. అయితే ఇలా చేసే అవకాశం ఉందని అంచనా వేస్తున్నారుగాని అలా జరుగుతుందో లేదో తెలియదు. అసెంబ్లీ ముట్టడికి చంద్రబాబు పిలుపునిచ్చారు కాబట్టి వాకౌట్ చేస్తారని రాజకీయ విశ్లేషకులు ఊహిస్తున్నారు. చూడాలి రేపు సీన్ ఎలా ఉంటుందో…!
