‘ఇలాంటి కథలు ఇదివరకెప్పుడూ రాలేదు’
‘మా సినిమా నచ్చకపోతే.. టికెట్ డబ్బులు తిరిగి ఇచ్చేస్తా’…. హీరోలు ఇలాంటి స్టేట్మెంట్లు ఇవ్వడం మామూలే. అయితే ‘ఇటాంటి పాయింట్ తో సినిమా వచ్చిందని నిరూపిస్తే సినిమాలే మానేస్తా’ అంటూ ఓపెన్ ఛాలెంజ్ విసరడం మాత్రం కొత్త. ఈ సాహసం యువ హీరో కిరణ్ అబ్బవరం చేశాడు.
కిరణ్ అబ్బవరం నటించిన సినిమా ‘క’. ఈ దీపావళికి విడుదలకు సిద్ధమవుతోంది. ఈ సినిమాపై కిరణ్ అబ్బవరం గట్టి నమ్మకాలు పెంచుకొన్నాడు. ప్రమోషన్ బాధ్యతలన్నీ నెత్తిమీద వేసుకొని చేస్తున్నాడు. ప్రొడక్షన్ కూడా తనే చూసుకొన్నాడని టాక్. టీజర్, ట్రైలర్ కూడా ఆకట్టుకొన్నాయి. కాకపోతే ఎక్కడో విరూపాక్ష, కాంతార లాంటి సెటప్పులు గుర్తొస్తున్నాయి. వాటికీ, ‘క’ సినిమాకూ ఏమైనా సంబంధం ఉందా? పాత హిట్ సినిమాలతో ఈ సినిమాకున్న పోలిక ఏమిటి? అని అడిగితే కిరణ్ స్పందించాడు. ‘క’ పూర్తిగా కొత్త కథ అని, ఏ సినిమాతోనూ సంబంధం లేదని, సినిమా చూశాక ఏమైనా పాత సినిమాలు గుర్తొస్తే, దేన్నో చూసి కాపీ కొట్టినట్టు నిరూపిస్తే ఇక సినిమాలే చేయను.. అంటూ బోల్డ్ స్టేట్మెంట్ ఇచ్చాడు. ఈ సినిమా కథని కిరణ్ అంతగా నమ్ముతున్నాడన్నమాట. ఆ కొత్తదనం ప్రేక్షకులూ ఫీల్ అయితే, కిరణ్కు మరో హిట్ దొరికేసినట్టే.
ఈ సినిమాని ఈనెల 31న తెలుగుతో పాటు తమిళ, మలయాళ భాషల్లోనూ విడుదల చేయాలని భావించారు. కాకపోతే.. ఇప్పుడు తెలుగులో మాత్రమే విడుదల అవుతోంది. నవంబరు 7న మిగిలిన భాషల్లో విడుదల చేస్తారు.
