నందమూరి బాలకృష్ణ నటించిన ‘డిక్టేటర్’, జూనియర్ ఎన్టీఆర్ నటించిన ‘నాన్నకు ప్రేమతో’ సినిమాలు రెండూ సంక్రాతి పండుగకే విడుదలవుతుండటంతో వారిద్దరి అభిమానుల మధ్య తెర వెనుక చిన్న యుద్ధం జరుగుతోంది. స్వర్గీయ నందమూరి తారక రామారావుకి తన కొడుకు జూ.ఎన్టీఆరే అసలయిన వారసుడు అని నందమూరి హరికృష్ణ ప్రకటించడంతో ఆ యుద్ధం ఇంకా తీవ్రమయింది.

ఇద్దరి సినిమాలు ఒకే సమయంలో విడుదలవుతుండటంతో, జూ. ఎన్టీఆర్ నటించిన ‘నాన్నకు ప్రేమతో’ సినిమాకు ప్రధాన సెంటర్లలో ధియేటర్లు దక్కకుండా బాలకృష్ణ వర్గం తెర వెనుక ప్రయత్నాలు చేస్తున్నట్లుగా మీడియాలో వార్తలు వస్తున్నాయి. అంతే కాదు నందమూరి అభిమానులు ‘నాన్నకు ప్రేమతో’ సినిమాని బాయ్ కాట్ చేయాలని మౌఖిక సందేశాలు పంపుతున్నట్లు వార్తలు వస్తున్నాయి.

వీటిని బాలకృష్ణ అభిమాన సంఘాలు ఖండిస్తున్నాయి. తమ అభిమాన హీరో బాలకృష్ణపై బురద జల్లి, ఆయనని అప్రదిష్ట పాలుచేసేందుకే కొందరు పనిగట్టుకొని ఇటువంటి విష ప్రచారం చేస్తున్నారని ఆవేదన వ్యక్తం చేసారు. కానీ హరికృష్ణ ‘వారసత్వ ప్రకటన’ తరువాత బాలకృష్ణ అభిమానులు తమ హీరోయే స్వర్గీయ నందమూరి తారక రామారావుకి అసలయిన వారసుడు అని కొన్ని చోట్ల ఫ్లెక్సీ బ్యానర్లు పెట్టినట్లు వార్తలు వస్తున్నాయి. అలాగే సామాజిక వెబ్ సైట్లలో కూడా ఇరువురి అభిమానుల మధ్య ఈ అంశంపై చిన్న యుద్ధం జరుగుతోంది ప్రస్తుతం.

ఇటువంటి సమయంలో జూ.ఎన్టీఆర్ తన బాబాయ్ బాలకృష్ణ అద్వర్యంలో నడుస్తున్న బసవతారక క్యాన్సర్ ఆసుపత్రికి రూ.6.25 లక్షలు, ఎన్టీఆర్ ట్రస్టుకి మరో రూ.6.25 లక్షల విరాళం ఇచ్చినట్లు తెలుస్తోంది. మాటీవీ ఛానల్లో నాగార్జున నిర్వహిస్తున్న “మీలో ఎవరు కోటీశ్వరుడు?” అనే కార్యక్రమంలో జూ. ఎన్టీఆర్ పాల్గొన్నారు. ఈ మధ్యనే హైదరాబాద్ అన్నపూర్ణా స్టూడియోలో దాని షూటింగ్ కూడా పూర్తయింది. ఆ కార్యక్రమం త్వరలోనే మా టీవీలో ప్రసారం కాబోతోంది. అందులో జూ. ఎన్టీఆర్ గెలుచుకొన్న రూ.12.5 లక్షలలో సగం మొత్తాన్ని బసవతారక క్యాన్సర్ ఆసుపత్రికి, మిగిలిన మొత్తాన్ని ఎన్టీఆర్ ట్రస్టుకి విరాళంగా ఇచ్చినట్లు తాజా సమాచారం. తెర వెనుక అభిమానుల మధ్య జరుగుతున్న యుద్దానికి ఫుల్ స్టాప్ పెట్టేందుకే జూ.ఎన్టీఆర్ ఆవిధంగా చేసారేమో?