వైఎస్ వివేకా హత్య కేసులో నిండా మునిగిపోయిన నిందితులు కొత్త కొత్త కథలు తెరపైకి తీసుకు వస్తున్నారు. ఇంత కాలం బయటకు రాని వైఎస్ వివేకా రెండో భార్య షమీమ్ సీబీఐకి ఇచ్చిన వాంగ్మూలం అంటూ ఆమె తరపు లాయర్ ఓ రిపోర్టును మీడియాకు పంపారు. అందులో ప్రధానంగా వివేకా కుమార్తెను.. వివేకా బావమరిదిని టార్గెట్ చేసి వాంగ్మూలం ఇచ్చినట్లుగా స్పష్టంగాఉంది.

వైఎస్ వివేకానంద రెడ్డితో 2010 లో తనకు వివాహం అయ్యిందని షేక్ షమీమ్ తెలిపారు. అయితే 2011లో మరోసారి వివాహం చేసుకున్నామన్నారు. రెండు సార్లు వివాహం జరిగినట్లుగా షమీమ్ తెలిపారు. 2015లో తమకు షహన్ షా పుట్టారని సీబీఐకి తెలిపింది. వివేక హత్యకు కొన్ని గంటల ముందు కూడా తనతో ఫోన్‌లో మాట్లాడినట్లు షమీమ్ తెలిపారు. తమ వివాహం వివేకా కుటుంబ సభ్యులకు ఇష్టం లేదని ఆమె తెలిపారు. వివేకా బామ్మర్ది, అల్లుడి అన్న నర్రెడ్డి శివప్రకాశ్ రెడ్డి తనను, తన కుటుంబ సభ్యుల్ని ఎన్నోసార్లు బెదిరించారని ఆమె సీబీఐకి ఇచ్చిన స్టేట్‌మెంట్‌లో తెలిపారు.

వివేకాకు దూరంగా ఉండమని సునీతా రెడ్డి సైతం హెచ్చరించేదని షమీమ్ వెల్లడించారు. వివేకా ఆస్తిపై సునీత భర్త రాజశేఖర్‌కు, వివేకా పదవిపై శివప్రకాశ్ రెడ్డి కన్నేశారని షమీర్ ఆరోపించారు. తమ కొడుకు షహన్ షా పేరు మీద 4 ఏకరాలు కొందామని వివేకా అనుకున్నా.. శివ ప్రకాష్ రెడ్డి ఆపేశాడని ఆమె వివరించారు. వివేకాను సొంత కుటుంబ సభ్యులే దూరం పెట్టారని.. అన్యాయంగా వివేకా చెక్ పవర్ తొలగించారని ఆమె ఆరోపించారు. చెక్ పవర్ తొలగించడంతో వివేకా ఆర్థిక ఇబ్బందులకు గురయ్యాడని షమీమ్ తెలిపారు. బెంగుళూరు ల్యాండ్ సెటిల్మెంట్ ద్వారా 8 కోట్లు వస్తాయని వివేకా తనతో చెప్పాడని.. హత్యకు కొన్ని గంటల ముందు కూడా 8 కోట్లు గురించి ఆయన తనతో మాట్లాడినట్లు ఆమె తెలిపారు. చనిపోయిన తరువాత వివేకా ఇంటికి వెళ్దామనుకున్న.. శివ ప్రకాష్ రెడ్డి మీద భయంతో అటు వైపు వెళ్లలేకపోయానని షమీమ్ వెల్లడించారు.

షమీమ్ మీడియా ముందుకు రాలేదు. ఆమె వివేకా ఆస్తుల కోసం రేపోమాపో కోర్టులో పిటిషన్ వేయబోతున్నారన్న ప్రచారాన్ని వైసీపీ సోషల్ మీడియా వర్గాలు ప్రచారం చేస్తున్నాయి. దీంతో ముందు ముందు వైఎస్ వివేకా రెండో భార్య హడావుడి ఎక్కువగా ఉండే అవకాశాలు కనిపిస్తున్నాయి.