https://www.youtube.com/watch?v=ZuQuOSPO51M
జయాపజయాలను పక్కన పెట్టి…. ఎప్పుడూ సరికొత్త కథలు, సరికొత్త పాత్రలపై దృష్టి పెడుతుంటాడు నాని. శ్యాం సింగరాయ్ కూడా నాని నుంచి రాబోతున్న మరో వెరైటీ సినిమా అని అర్థమవుతోంది. సాయి పల్లవి, కృతిశెట్టి కథానాయికలుగా నటించిన చిత్రమిది. రాహుల్సంకృత్యన్ దర్శకుడు. చిత్రీకరణ పూర్తయింది. డిసెంబరు 24న విడుదల చేయడానికి చిత్రబృందం సమాయత్తం అవుతోంది. ఈలోగా.. ఈ సినిమాలోని ఓ పాటని వినిపించబోతోంది. ఈనెల 6న రైజ్ ఆఫ్ శ్యాం గీతాన్ని విడుదల చేయనున్నారు. ఈరోజు ఈ పాటకు సంబంధించిన ప్రోమో వచ్చింది.
ఎగసి ఎగసి పడె అలజడి వాడే…
తిరగబడిన సంగ్రామం వాడే…
వెనకబడని చైతన్యం వాడే.. – శ్యామ్ సింగారాయ్… అంటూ సాగే ఈ గీతాన్ని కె.కె రాశారు. పాటలో… శ్యామ్ సింగారాయ్ క్యారెక్టరైజేషన్ మొత్తం ఆవిష్కరించినట్టు అర్థం అవుతోంది. ఈ వాక్యాలు చూస్తుంటే, ఓ నాయకుడులో కమల్ హాసన్ లా.. నాని క్యారెక్టర్ ఉండబోతోందా? అనిపిస్తోంది. ప్రచార చిత్రాల్లో నాని గెటప్ కొత్తగా కనిపిస్తోంది. వయసుకు మించిన బరువైన పాత్రేదో పోషించబోతన్నాడనిపిస్తోంది. నాని ఎలాంటి క్యారెక్టర్ అయినా హ్యాండిల్ చేయగలడు. మరి శ్యామ్ సింగరాయ్ని ఎలా నడిపిస్తాడో చూడాలి.
