నాని – విక్రమ్ కె.కుమార్ కాంబినేషన్లో ‘గ్యాంగ్ లీడర్’ తెరకెక్కుతున్న సంగతి తెలిసిందే. ఈ టైటిల్ పై వివాదం రాజుకుంది. `ఇది మా టైటిల్` అని ఓ నిర్మాత ఛాంబర్లో ఫిర్యాదు చేశాడు. ‘గ్యాంగ్ లీడర్’ పేరుతో ఓ చిన్న సినిమా ఇటీవలే పట్టాలెక్కేసింది కూడా. ఈ రెండింటిలో ఏ సినిమాకి ‘గ్యాంగ్ లీడర్’ టైటిల్ దక్కుతుందో అనేది ప్రశ్నార్థకంగా మారింది.
ఈ వివాదం గురించి నాని స్పందించాడు. తన వరకూ ఈ గొడవ రాలేదని, నిజానికి ఈ కథకు గ్యాంగ్ లీడర్ అనే పేరు తప్ప మరేదీ సూట్ అవ్వదని క్లారిటీ ఇచ్చాడు నాని. “గ్యాంగ్ లీడర్ సినిమాకి నేను పెద్ద అభిమానిని. ఆ కథకూ, విక్రమ్ సినిమాకీ ఎలాంటి సంబంధం ఉండదు. కానీ… ఈ కథకు గ్యాంగ్ లీడర్ అనే పేరు మినహా మరేదీ మ్యాచ్ కాదు. ఈ సినిమా చూశాక… ‘గ్యాంగ్ లీడర్’ కంటే బెటర్ టైటిల్ ఉండదని ప్రేక్షకులే చెబుతారు. అప్పటికీ ”ఈ సినిమాకి గ్యాంగ్ లీడర్ అనే పేరు అవసరం లేదని ఎవరైనా చెబితే కనుక.. టైటిల్ మార్చేస్తాం” అంటున్నాడు. సినిమా విడుదలయ్యాక టైటిల్ మార్చడం అంటూ ఉంటుందా?? నాని ఏదో ఫార్మాలిటీకి ఇలా చెప్పుంటాడు అంతే. అసలు ఇంత గొడవెందుకు… ‘గ్యాంగ్ లీడర్’ అనే పేరుకి ముందు నాని.. అని పెడితే సరిపోతుంది. టైటిల్ వివాదాలన్నీ ఇలానే సద్దుమణిగాయి కదా?
