ఏపీ డిప్యూటీ సీఎం పవన్ కళ్యాణ్ కోనసీమ పర్యటనలో అనుమానాస్పదంగా ఆయన వెంట పర్యటించిన వ్యక్తిని పోీలసులు గుర్తించారు. వీడియోల ఆధారంగా మలికిపురం మండలం గూడపల్లికి చెందిన పున్నం నరసింహారావు అనే వ్యక్తిగా గుర్తించారు. అతను వైసీపీ కార్యకర్త. వైసీపీ అధికారంలో ఉన్నప్పుడు గూడపల్లి గ్రామంలో వైసీపీ నాయకునిగా హడావుడి చేసేవాడు. ఫ్లెక్సీలు కట్టేవాడు. వైసీపీకు అనుకూలంగా, కూటమికు వ్యతిరేకంగా సోషల్ మీడియాలో పోస్టులు పెట్టేవాడు.
అయితే కూటమి అధికారంలోకి వచ్చాక జనసేనలో చేరిపోయాడు. మలికిపురం మండల వైస్ ఎంపీపీ, జనసేన నాయకుడు సుందర శ్రీనివాస్ అనుచరుడిగా మారారు. పవన్ పర్యటనకు సంబంధించి వైస్ ఎంపీపీగా ఉన్నందున సుందన శ్రీనివాస్కు వీవీఐపీ పాస్ లభించింది. అది నరసింహ తీసుకున్నాడు. నేరుగా ఆ పాస్ పట్టుకుని పవన్ పక్కనే నిలబడి కార్యక్రమం అంతా ఉన్నాడు. తర్వాత కొంత మంది గుర్తించడంతో ఈ విషయం వెలుగులోకి వచ్చింది.
ఎస్ఐ నరసింహను పిలిచించి పర్యటనలో ఎందుకు పాల్గొన్నారో ఆరా తీశారు. అయితే తనకు తప్పుడు ఉద్దేశాలు లేవని.. జనసేన కార్యకర్తనేనని చెప్పాడు. పవన్ కల్యాణ్ అంటే అభిమానంతోనే అత్యంత దగ్గరగా చూసేందుకు వచ్చినట్లు పోలీసుల విచారణలో చెప్పినట్లు తెలిసింది. ఇతను ప్రస్తుతం జనసేనలో సభ్యత్వం కలిగి ఉన్నాడు.
