ప్రభుత్వ పాఠశాలల పిల్లలందర్నీ “బైజూస్”కు అప్పగించడాన్ని గొప్ప విద్యా సంస్కరణగా సీఎం జగన్ భావిస్తున్నారు. నిజానికి ఈ ఎడ్యూటెక్ యాప్లపై తీవ్రమైన ఆరోపణలు ఉన్నాయి. విద్యార్థుల మానసిక స్థితిని దెబ్బతీస్తున్నాయని.. తప్పుడు ప్రకటనలు ఇస్తున్నాయని.. భారీగా డబ్బులు గుంజుతున్నాయని విమర్శలు ఉన్నాయి. ఇండియాలో ఇంకా పూర్తి స్థాయిలో వీటి విజృంభణ ప్రారంభం కాలేదు. బైజూస్ స్టార్టప్గా ప్రారంభించి కాస్త ఆదరణ పొందగానే పెట్టుబడులు సమీకరించి.. ఇతర ఎడ్యూటెక్ స్టార్టప్లను కొనుగోలు చేసి పోటీ లేకుండా చేసుకుంది.
ఇలాంటి ఎడ్యూటెక్ కంపెనీలను చైనా ఇటీవల నిషేధించింది. ఆ దేశంలో కూడా పెద్ద ఎత్తున పలు ఎడ్యూటెక్ కంపెనీలు ప్రారంభమయ్యాయి. కొన్ని కంపెనీల విలువ లక్షల కోట్ల విలువైనవిగా ఎదిగాయి. అయితే అవి విద్యార్థుల మనుసులను కలుషితం చేసి..లాభార్జన చేస్తున్నాయని.. విద్యను లాభాల కోసం వాడుతున్నారని చైనా అధ్యక్షుడు వాటిపై అనేక ఆంక్షలు విధించారు. ఫలితంగా ఆ కంపెనీలన్నీ కుప్పకూలిపోయాయి. కొన్ని లక్షల కోట్ల సంపద ఆవిరైపోతుందని తెలిసిన భావి చైనా పౌరుల భవిష్యత్ దృష్ట్యా వాటిని చైనా అధ్యక్షుడు నియంత్రించేశారు. ఎడ్యూటెక్ యాప్లపై ఇప్పటికే అనేక దేశాల్లో ఆంక్షలు అమలు చేసే యోచనలో ఉన్నాయి.
తన వాదనకు ఏది అనుకూలంగా ఉంటే దాన్ని ఉదాహరణగా తీసుకోవడం సీఎం జగన్కు అలవాటు. ఆయన సలహాదారులు.. రీసెర్చర్లు వెదికి మరీ ఈ పోలికలు తెచ్చి జగన్కు ఇస్తూంటారు. జగన్ వల్లె వేస్తూంటారు. మూడు రాజధానులు ఎందుకు పెడుతున్నారంటే… అల్లదిగో దక్షిణాఫ్రికాలో ఉందన్నారు. ప్రపంచంలో ఎక్కడా లేదు ఒక్క దక్షిణాఫ్రికాలోనే ఉంది. .మనకెందుకు అని చెప్పుకోలేదు. అది చేయాలనుకున్నారు కాబట్టి దక్షిణాఫ్రికాను ఉదాహరణగా చూపించారు. తాజాగా టెన్త్ ఫలితాల విషయంలోనూ అదే దారి. గుజరాత్లో మన కంటే ఒక శాతం తక్కువగా వచ్చాయట. సీఎమ్మే స్వయంగా చెప్పారు. గుజరాత్లో టెన్త్ ఫలితాల స్థాయి మొదటి నుంచి అదే. కానీ ఏపీలో తొంభై శాతం నుంచి దిగజారిపోవడం గురించి మాత్రం చెప్పరు.
ఇప్పుడు బైజూస్ విషయంలో చైనాను ఎందుకు ఆదర్శంగా తీసుకోరన్న ప్రశ్న వస్తోంది. పిల్లలకు మంచి జరుగుతుంది కదా అనే ఓ వాదనను తెరపైకి తీసుకు వస్తున్నారు. కాస్ట్లీ చదువులను ఇస్తున్నామని నమ్మించే ప్రయత్నం చేస్తున్నారు. కానీ అది ఆన్ లైన్ చదువు అనే సంగతి మర్చిపోతున్నారు. ఆన్ లైన్ చదువులు ఎలా ఉంటాయో ప్రత్యేకంగా చెప్పాల్సిన పని లేదు. బైజూస్కే అలవాటు పడితే ఇక ఏపీలో టీచర్ల అవసరమే ఉండదు.
