ప్రధానమంత్రి నరేంద్రమోడీ మరోసారి ముఖ్యమంత్రులతో వీడియో కాన్ఫరెన్స్ నిర్వహించనున్నారు. ఇరవై ఏడో తేదీన ఈ వీడియో కాన్ఫరెన్స్ జరగనుంది. ఎజెండా వైరస్ ను కట్టడి చేయడంపై ముఖ్యమంత్రులతో చర్చించడమే. అయితే… ఇప్పటికి లాక్ డౌన్ ప్రారంభమైన తర్వాత మూడు సార్లు ప్రధానమంత్రి వీడియో కాన్ఫరెన్స్ పెట్టారు. మూడు సార్లూ.. ఓ ప్రత్యేకమైన కారణంపై అభిప్రాయం తెలుసుకోవడానికే పెట్టారు. నేరుగా కాకపోయినా… పరోక్షంగా అభిప్రాయాలు తెలుసుకునే ప్రయత్నం చేశారు. ఈ సారి వీడియో కాన్ఫరెన్స్లో ఏ అంశంపై ముఖ్యమంత్రుల ఓపినియన్స్ తెలుసుకంటారన్న చర్చ ప్రారంభమయింది.
ప్రస్తుతం లాక్ డౌన్ నుంచి ఎలా బయటపడాలన్నదానిపై కేంద్రం సమాలోచనలు జరుపుతోంది. ఎగ్జిట్ ప్లాన్స్పై సీరియస్గా చర్చిస్తున్నామని కేంద్ర ప్రభుత్వ వర్గాలు చెబుతున్నాయి. రాజ్నాథ్ నేతృత్వంలోని మంత్రుల బృందం కూడా చర్చలు జరిపింది. మూడో తేదీ వరకు.. కేంద్రం లాక్ డౌన్ ఉంది. ఆ తర్వాత ఒక్క సారిగా ఎత్తేస్తే పరిస్థితులు విషమిస్తాయి. ఎలా చూసినా.. లాక్ డౌన్ ఎత్తివేతకు ఓ వ్యూహం అమలు చేయాల్సి ఉంటుంది. దీనిపై ముఖ్యమంత్రులతో చర్చిస్తారని అంటున్నారు. సీఎంల అభిప్రాయాలు తెలుసుకుంటారని చెబుతున్నారు. అయితే… ప్రస్తుతం దేశంలో వైరస్ ఉద్ధృతి ఏ మాత్రం తగ్గలేదు. ప్రమాదకరంగా వ్యాప్తి చెందుతూనే ఉంది. ఈ కారణంగా లాక్ డౌన్ పొడిగిస్తే.. ఎలా ఉంటుందన్న దానిపైనా ముఖ్యమంత్రులతో మోడీ చర్చిస్తారని మరి కొంత మంది అభిప్రాయం వ్యక్తం చేస్తున్నారు.
ప్రస్తుత పరిస్థితుల్లో కేంద్రం ఏ నిర్ణయం తీసుకున్నా.. రాష్ట్రాలతో చర్చించాల్సిన పరిస్థితి ఉంది. కేంద్రం సూచనలు మాత్రమే చేస్తోంది. అమలు చేయాల్సిన బాధ్యత రాష్ట్ర ప్రభుత్వాలపైనే ఉంది. అందుకే… పలు రాష్ట్రాలు కేంద్రం ఇచ్చిన మినహాయింపుల్ని అమలు చేయకుండా లాక్ డౌన్ కొనసాగిస్తున్నాయి. మరికొన్ని రాష్ట్రాలు ఎక్కువ రిలాక్సేషన్స్ ఇచ్చేశాయి. దీనిపై కేంద్రం అసంతృప్తి వ్యక్తం చేసింది కూడా. 27వ తేదీన… నరేంద్రమోడీ.. లాక్ డౌన్ ఎగ్జిట్ ప్లాన్ లేదా కొనసాగింపుపై ముఖ్యమంత్రుల అభిప్రాయాలు తీసుకుని ఆ మేరకు తదుపరి నిర్ణయం తీసుకునే అవకాశం ఉంది.
