వైఎస్ వివేకానందరెడ్డి కేసులో విచారణ ఎదుర్కొంటున్న కడప వైఎస్ఆర్సీపీ ఎంపీ అవినాష్ రెడ్డి తెలంగాణ హైకోర్టులో ముందస్తు బెయిల్ పిటిషన్ దాఖలు చేశారు. తనను సీబీఐ అధికారులు అరెస్టు చేయకుండా ఆదేశాలివ్వాలని కోరారు. సీబీఐ అరెస్ట్ చేస్తుందన్న భయంతో ముందు జాగ్రత్తగా అరెస్ట్ చేయకుండా ఆదేశాలివ్వాలని హైకోర్టును ఆశ్రయించినట్లుగా తెలుస్తోంది. ఇంతకు ముందు కూడా అవినాష్ రెడ్డి ముందస్తు బెయిల్ అనే పదంలేకపోయినా సీబీఐ అరెస్టు చేయకుండ ఆదేశాలివ్వాలని పిటిషన్ వేశారు. కానీ ఆ పిటిషన్ను హైకోర్టు తోసి పుచ్చింది. మరో సారి ముందస్తు బెయిల్ పేరుతో పిటిషన్ దాఖలు చేశారు.
వై.ఎస్. వివేకా హత్య కేసులో అవినాష్ రెడ్డిపై ప్రధానంగా సీబీఐ అనుమానాలు వ్యక్తం చేసింది. శివశంకర్రెడ్డితో కలిసి అవినాష్ రెడ్డి, భాస్కర్రెడ్డి వివేకా హత్యకు కుట్ర పన్నినట్లు తెలుస్తోందని సీబీఐ చెబుతోంది. హత్య జరిగిన రోజు రాత్రి వై.ఎస్. అవినాష్రెడ్డి, భాస్కర్రెడ్డి ఇంటికి సునీల్ యాదవ్ వెళ్లాడని ఐదుగురితో కలిసి అవినాష్రెడ్డి హత్య స్థలానికి వెళ్లాడని తెలిపింది. నిందితులు హత్య జరిగిన స్థలాన్ని శుభ్రం చేశారని వివేకా శరీరంపై ఉన్న గాయాలు కనిపించకుండా బ్యాండేజీ కట్టారని కోర్టుకు సమర్పించిన కౌంటర్లో సీబీఐ పేర్కొంది. సిబిఐ అధికారులు వివేకానంద రెడ్డి హత్య కేసులో ఇప్పటికే పలుమార్లు అవినాష్ రెడ్డిని విచారించారు.
ఈ కేసులో విచారణ అధికారిని మార్చాలని సుప్రీంకోర్టు ఇప్పటికే ఆదేశించింది. స్టేటస్ రిపోర్టులో ఎలాంటి పురోగతి లేదని సుప్రీంకోర్టు ధర్మాసనం ఈ సందర్భంగా గుర్తించింది. కేసును ఇంకా ఎంత కాలం విచారణ చేస్తారని, హత్యకు గల ప్రధాన కారణాలు, ఉద్దేశాలు బయటపెట్టాలని ధర్మాసనం ఆదేశించింది. ‘విచారణ చేసే అధికారిని మార్చండి లేదా ఇంకో అధికారిని నియమించండి’ అని ధర్మాసనం ఘాటు వ్యాఖ్యలు చేసింది. మెరిట్స్ మీద ఎలాంటి ఉత్తర్వులు ఇవ్వడం లేదని న్యాయస్థానం స్పష్టం చేసింది.
