భారతీయ జనతా పార్టీకి మిత్రపక్షం శివసేన గట్టి షాక్ ఇచ్చింది. నిన్న మీ వెంటే ఉంటామంటూ… హామీ ఇచ్చి ప్రధాని మోడీ, అమిత్ షాలను ప్రశాంతంగా నిద్రపోనిచ్చిన శివసేన… తెల్లవారేసరికి స్టాండ్ మార్చేసుకుంది. ఓటింగ్ కు దూరం ఉంటామని ప్రకటించింది. శివసేన దూరంగా ఉండటం వల్ల ప్రభుత్వానికి వచ్చిన ముప్పేమీ లేదు కానీ… భవిష్యత్ రాజకీయాలపై మాత్రం తీవ్ర ప్రభావం చూపించనుంది. వచ్చే ఎన్నికల్లో ఎట్టి పరిస్థితుల్లోనూ బీజేపీతో కలసి పోటీ చేసేది లేదని ఇప్పటికే నిర్ణయం తీసుకన్న శివసేన…అవిశ్వాసం విషయంలో కాస్తంత మెట్టు తగ్గినట్లు అనిపించింది.
దీంతో బీజేపీ వర్గాలు.. తమను శివసేన వీడిపోదని ప్రచారం ప్రారంభించింది. వచ్చే ఎన్నికల్లోనూ మహారాష్ట్రాలో కలసి పోటీ చేస్తామన్నట్లుగా సంబరపడ్డాయి. కానీ ఆ ఆనందాన్ని ఉద్దవ్ థాకరే ఎక్కువ సేపు ఉండనీయలేదు. నిన్న విప్ పొరపాటుగా జారీ చేశామని, దాన్ని వెనక్కి తీసుకున్నామని పార్టీ సీనియర్ నేతలు ఉదయాన్నే ఓటింగ్కు దూరంగా ఉండాలని తాము నిర్ణయించుకున్నట్లు తెలిపారు. పార్లమెంట్ లో తెలుగుదేశం పార్టీకి పోరాటానికి మద్దతు తెలుపాలని కోరేందుకు.. తెలుగుదేశం పార్టీ ఎంపీలు శివసేన చీఫ్ ను కలవాలనుకున్నారు. కానీ సమయం ఇవ్వలేదు. దాంతో బీజేపీవైపే శివసేన ఉంటుందన్న అభిప్రాయం వ్యక్తమయింది. కానీ తమ విధానం ఒంటరి పోరేనని మరోసారి స్పష్టం చేసినట్లయింది. బీజేపీ, శివసేన భావసారూప్యత ఉన్న పార్టీలు. నరేంద్రమోడీ ప్రధాని అయిన తర్వాత మహారాష్ట్రలో శివసేన క్యాడర్ ను… తమలో కలుపుకోవాలన్న ప్రయత్నం జరిగింది. దీంతో తమ పార్టీపై కుట్ర చేస్తున్నారని శివసేన ఆగ్రహం వ్యక్తం చేస్తోంది.
ఎన్డీఏలో ఉన్నప్పటికీ…లేనట్లుగానే వ్యవహరిస్తోంది. మోదీ విధానాలను తీవ్రంగా వ్యతిరేకిస్తోంది. మిత్రులందరూ దూరమవుతూండటంతో కొద్ది రోజులు క్రితం అమిత్ షా ప్రత్యేకంగా ముంబై వెళ్లి శివసేన చీఫ్ తో సమావేశయ్యారు. అయినా పరిస్థితులు మెరుగుపడలేదని తాజా నిర్ణయంతో తేటతెల్లమయింది. ఇది అవిశ్వాస తీర్మానం విషయంలో బీజేపీకి వచ్చిన మొదటి షాక్ గా చెప్పుకోవచ్చు.
