వైసీపీ నేతలు ఖైదీల కోసం ఆరాట పడుతున్నారు. గత వారం జైల్లో ఉన్న ఎంపీలకూ రాష్ట్రపతి ఎన్నికల్లో ఓటు వేసే అవకాశం కల్పించాలంటూ ఓ ప్రైవేటు బిల్లును ఎంపీ విజయసాయిరెడ్డి రాజ్యసభలో ప్రవేశపెట్టారు. ఇంత అర్జంట్గా జైల్లో ఉన్న ఎంపీల గురంచి ఆయనకు ఎందుకు అభిమానం వచ్చిందో తెలియదు. కానీ ఇప్పుడు కొత్తగా ఖైదీలకు ప్రైవేటు వైద్యం అందించేందుకు ఏపీ ప్రభుత్వం నిర్ణయించుకుంది. నేరాలు చేసి జైళ్లలో ఉన్న ఖైదీలకు ఇక నుండి ఆరోగ్యశ్రీ పథకం అమలు చేయనున్నారు. ఈ పథకం కింద ప్రభుత్వ, ప్రైవేటు ఆస్పత్రుల్లో మెరుగైన, నాణ్యమైన వైద్యాన్ని పైసా ఖర్చు లేకుండా, పూర్తి ఉచితంగా అందించాలని నిర్ణయించారు.
ఇప్పటి వరకూ ఖైదీకి అనారోగ్యం వస్తే ప్రభుత్వ ఆసుపత్రులకు తీసుకు వెళ్లే వారు. అయితే ఖైదీలకు సరైన వైద్యం అందడం లేదని ప్రభుత్వం భావిస్తోంది. పెద్ద ఎత్తున ఆస్ప్తరులను బాగు చేశామని.. ఇతర రాష్ట్రాల నుంచి వైద్యం కోసం వస్తున్నారని… సమీక్షలు చేసి మరీ చెప్పే ప్రభుత్వ పెద్దలకు.. ఖైదీల విషయానికి వచ్చే సరికి అది మర్చిపోయారు. ప్రభుత్వ వైద్యశాలల్లో ఖైదీలకు సరైన వైద్యం అందడం లేదని.. ప్రైవేటుకు తరలించేందుకు..అదీ కూడా ప్రభుత్వ ఖర్చుతో అందించేందుకు సిద్ధమయ్యారు.
తాజాగా జీవో వచ్చింది కానీ. .జగన్ పదవి చేపట్టిన కొత్తలోనే ఖైదీల గురించి ఆలోచించారు. 2019 డిసెంబర్ లో జరిగిన ప్రిజన్ డెవెలప్మెంట్ బోర్డు భేటీలో ముఖ్యమంత్రి వైఎస్ జగన్ మోహన్ రెడ్డి ఖైదీలకు అందుతున్న వైద్య సదుపాయాలపై రిపోర్టు ఇవ్వాల్సిందిగా జైళ్ల శాఖను ఆదేశించారు. అప్పట్లో వచ్చిన ప్రతిపాదనను బట్టి ఈ ఏడాది జులై 22న జీవో విడుదల చేశారు. ప్రభుత్వంలో జీవోలు ఎప్పుడు విడుదల చేసినా.. బయట పెట్టాలనుకున్నప్పుడు మాత్రమే పెడుతున్నారు కాబట్టి తాజాగా వెలుగులోకి వచ్చాయి.
