వైఎస్ వివేకానందరెడ్డి హత్య కేసులో తాజాగా సీబీఐ అధికారులకు పోస్టుమార్టం రిపోర్టులో అనేక అనుమానాలు బయట పడ్డారు. వాటిని నివృతి చేసుకోవడానికి పోస్టుమార్టం చేసిన డాక్టర్ను పిలిపించారు. అసలు ఇప్పటి వరకూ పోస్టుమార్టం రిపోర్టునే చూడనట్లుగా ఇప్పుడే దాని గురించి తెలిసినట్లుగా సీబీఐ అధికారులు హడావుడి చేయడం.. కొత్త అనుమానాలకు దారి తీస్తోంది. వివేకా హత్య కేసులో పోస్టుమార్టం నివేదిక అత్యంత కీలకం. ఎందుకంటే ఆయనది మొదట గుండెపోటని ప్రచారం చేశారు. కానీ పోస్టుమార్టంతోనే హత్య అనివెలుగులోకి వచ్చింది.
వివేకానందరెడ్డి చనిపోయిన తర్వాత వైఎస్ జగన్ మామ అయి ఈసీ గంగిరెడ్డి వచ్చి మృతదేహాన్ని పరిశీలించారు. తర్వాత ఆస్పత్రి నుంచి నిపుణులు వచ్చి రక్తం తుడిచి.. గాయాలకు కుట్లు వేసి.. బ్యాండేజ్ చుట్టి అంత్యక్రియలకు ఏర్పాట్లు చేశారు. పోస్టుమార్టం అవసరం లేదని వైద్యులకు, పోలీసులుకు కూడా సమాచారం ఇచ్చారు. అయితే హైదరాబాద్లో ఉన్న వివేకా కుమార్తె వైఎస్ సునీత పట్టుబట్టడంతో పోస్టుమార్టం చేయించారు. అప్పుడే వైఎస్ వివేకా మృతదేహానికి ఉన్న గాయాలన్నీ బయటపడ్డాయి. అప్పటి వరకూ గుండెపోటుగానే ప్రచారం జరిగింది.
పోస్టుమార్టం రిపోర్ట్ వచ్చిన తర్వాత అవన్నీ పదునైన ఆయుధంతో దాడి చేసినట్లుగా తేల్చడంతో హత్యగా నిర్ధారించారు. ఈ కారణంగా సీబీఐ అధికారులు పోస్టుమార్టం నివేదికపై ప్రత్యేకమైన పరిశీలన చేస్తున్నట్లుగా తెలుస్తోంది. ఇంత కాలం ఎందుకు పరిశీలించలేదో సీబీఐ అధికారులకే తెలియాలి. వైఎస్ వివేకా కేసులో ఆధారాలు ఇస్తే రూ. ఐదు లక్షలు ఇస్తామంటూ పేపర్ ప్రకటన ఇచ్చిన తర్వాత సీబీఐ దర్యాప్తుపై పలువురు విమర్శలు చేస్తున్నారు. విజయవాడలో రాహుల్ అనే వ్యక్తి హత్య కేసును పోలీసులు వారంలోచేధిస్తే.. సీబీఐకి ఏమయిందని ఇన్ని రోజులు టైం పాస్ చేస్తున్నారని ప్రశ్నిస్తున్నారు.
