పవన్ కల్యాణ్ మళ్లీ మేకప్ ఎప్పుడు వేసుకుంటాడా? అని ఎదురు చూసిన అభిమానుల నిరీక్షణ ఫలించింది. ఈరోజే పవన్ `పింక్` రీమేక్ మొదలైంది. ఓ రకంగా ఈ ఘడియ కోసమే అభిమానులు చూస్తున్నారు. చిత్రసీమకూ పవన్ శక్తి తెలుసు. పవన్ సినిమా హిట్టయితే బాక్సాఫీసు దగ్గర ఎలాంటి సంచలనాలు సృష్టిస్తుందో తెలుసు. అందుకే పవన్ రీ ఎంట్రీని చిత్రసీమ కూడా స్వాగతిస్తుంది. అభిమానులైతే సంబరాలు చేసుకుంటున్నారు.
కానీ.. పవన్ రీ ఎంట్రీ రాంగ్ టైమ్లో జరిగిందా? అనిపిస్తోందిప్పుడు. ఓ పక్క ఆంధ్రలో అమరావతి రైతులు రాజధాని విషయంలో రోడెక్కి ఉద్యమాలు చేస్తున్నారు. నిరసనలు, అరెస్టులూ ఊపందుకున్నాయి. అసెంబ్లీలో తీర్మాణాలు జరుగుతున్నాయి. ఇలాంటి సమయంలో కూల్గా సెట్లోకి వెళ్లి `యాక్షన్` చేసుకోవడం కొంతమందికి నచ్చడం లేదు. పవన్ సినిమాలు చేసుకోవడంలో ఎవ్వరూ తప్పుబట్టరు. కానీ రాజధాని రైతులకు వెన్నుదన్నుగా ఉంటానన్న పవన్, సరిగ్గా వాళ్లకు అండగా నిలబడాల్సిన సమయంలో హైదరాబాద్లో వాలిపోవడం, ఇక్కడ షూటింగులు చేసుకోవడం కాస్త మింగుడు పడని వ్యవహారమే. ఈ విషయంలో పింక్ బృందం కాస్త అప్రమత్తతతో వ్యవహరించింది. ఓపెనింగ్కి మీడియాని దూరంగా పెట్టింది. ఎలాంటి ఆర్భాటాలూ చేయకుండా కామ్గా క్లాప్ కొట్టేశారు. అయితే పవన్కి సంబంధించిన కొన్ని ఫొటోలు సోషల్ మీడియాలో లీకయ్యాయి. ఓ వైపు రాజధాని రైతులు రోడెక్కితే, ఈసమయంలో పవన్ షూటింగులు చేసుకుంటున్నాడా? అంటూ చాలామంది విమర్శల దాడికి దిగుతున్నారు.
