హైదరాబాద్ లాక్‌డౌన్ ప్రచారంతో .. ప్రజల్లో ఏర్పడిన కంగారు.. ప్రభుత్వానికి పెద్ద ఎత్తున ఆదాయం సంపాదించి పెట్టింది. నిత్యావసర వస్తువులు.. నెలకు సరిపడా కొనుగోలు చేసి పెట్టుకున్నారు జనాలు. అయితే.. దీనిపై వచ్చే ఆదాయం ప్రభుత్వానికి పెద్దగా ఉండదు. కానీ అసలు ఆదాయం.. మందు బాబుల వద్ద నుంచి వచ్చింది. గతంలో లాక్‌డౌన్ టైంలో బ్లాక్‌లో ఫుల్ బాటిల్ ఐదు వేల రూపాయలకు సైతం కొనుగోలు చేసిన అనుభవాలు గుర్తున్నాయేమో కానీ.. మళ్లీ లాక్‌డౌన్ ఆలోచనలు ప్రభుత్వం చేస్తోందన్న ప్రచారం జరగగగానే.. మందు బాబులు.. మద్యం దుకాణాల ముందు క్యూ కట్టారు. ఎంత వీలైతే అంత కొని స్టాక్ పెట్టుకున్నారు. ఫలితంగా.. ప్రభుత్వానికి కాసుల పంట పండింది.

జూన్‌ 26 నుంచి 30 మధ్య ఐదు రోజుల్లో రూ.973.61 కోట్ల మద్యం అమ్మకాలు జరిగాయి. లాక్‌డౌన్‌ విధిస్తే, ఎక్కడ షాపులు మూతపడతాయేమోనన్న కంగారుతో మందుబాబులు పెద్ద మొత్తంలతో మద్యం కొని నిల్వ చేసుకున్నారు. లాక్‌డౌన్‌ తర్వాత మే 6 నుంచి 31 వరకు సాగిన విక్రయాల్లో రూ.1864 కోట్ల రాబడి వచ్చింది. జూన్‌లో రూ.1955 కోట్ల ఆదాయం సమకూరింది. సాధారణ రోజుల్లో బేవరేజెస్‌ కార్పొరేషన్‌ మద్యం డిపోల నుంచి వైన్‌ షాపు ఓనర్లు రోజుకు రూ.70-75 కోట్ల విలవైన మద్యాన్ని కొనుగోలు చేస్తూంటారు. జూన్‌ 26 నుంచి 30వ తేదీ వరకు రోజుకు రూ.150 కోట్లకు పైగానే దుకాణాలకు వ్యాపారులు తీసుకెళ్లారు. ఆ తర్వాత కూడా అంటే జూలై 1 నుంచి 4 వరకు కూడా విక్రయాలు బాగానే ఉన్నాయి.

లాక్‌డౌన్ ఎత్తి వేసిన సమయంలో .. రెండు నెలల పాటు మద్యం దొరక్క అవస్థలు పడిన మందుబాబులు.. దుకాణాల ముందు పడిగాపులు పడ్డారు. అప్పుడు పెద్ద ఎత్తున ప్రభుత్వానికి ఆదాయం వచ్చింది. మరోసారి లాక్ డౌన్ ప్రచారంతో .. ఆదే స్థాయి ఆదాయం వచ్చింది. కానీ లాక్ డౌన్ విషయంలో మాత్రం.. ప్రభుత్వం సైలెంటయిపోయింది. ప్రస్తుతానికి అలాంటి ఆలోచనలు లేవని తేల్చేసింది. దీంతో.. మందుబాబులు ఊసురుమనక తప్పడం లేదు.