ఆంధ్రప్రదేశ్ బీజేపీ అధ్యక్షుడు సోము వీర్రాజును తొలగించడం ఖాయంగా కనిపిస్తోంది. ఆయన ప్లేస్ లో బీజేపీ జాతీయ కార్యదర్శి సత్యకుమార్ ను నియమించాలని దాదాపుగా నిర్ణయించుకున్నారు. కేంద్ర మంత్రి వర్గ పునర్ వ్యవస్థీకరణ జరిగిన వెంటనే… పార్టీలోనూ ప్రక్షాళన చేయనున్నారు ప్రస్తుతం జాతీయ కార్యదర్శిగా ఉన్న సత్యకుమార్కు హైకమాండ్ వద్ద పలుకుబడి ఉంది. ఆయన కూడా ఏపీ బీజేపీ చీఫ్ కావాలనుకుంటున్నారు.
ఆయనకు ఏపీ బీజేపీలోని ఓ వర్గం మద్దతు బలంగా ఉంది. అయితే సోము వీర్రాజు మాత్రం తానే చీఫ్ గా కొనసాగాలని కోరుకుంటున్నారు . ఆయనకు మరో వర్గం అండగా ఉంది. ముఖ్యంగా సునీల్ ధియోధర్ అండగా ఉంటున్నారు. ఆయన కో ఇంచార్జ్. అసలు ఇంచార్జ్ మురళీధరన్ .. రాష్ట్రం గురించి పట్టించుకునేది తక్కువే. అందుకే సునీల్ ధియోధర్.. చక్రం తిప్పుతూఉంటారు. ఆయన సోము వీర్రాజుకు సపోర్ట్ చేస్తూంటారు. ఆయన నేతృత్వంలోనే ఎన్నికలకు వెళ్తామని ధియోధర్ ప్రకటించేశారు.
కానీ జీవీఎల్, ధియోధర్, సోము వీర్రాజు ఓ గ్రూప్ అని వీరంతా పేరుకే బీజేపీ కానీ.. మొత్తంగా వైసీపీ కోసం పని చేస్తూంటారన్న వాదన బీజేపీలోని ఓ వర్గం చేస్తూ ఉంటుంది. వారికి ఇటీవలి కాలంలో సత్యకుమార్ రూపంలో నాయకుడు వచ్చారు. జాతీయ స్థాయిలో ఇతర రాష్ట్రాల్లో బిజీగా ఉండే సత్యకుమార్ .. ఇటీవల రాష్ట్రంపై ఆసక్తి చూపిస్తున్నారు. ఆయన ఎక్కువగా రాష్ట్రంలోనే ఉంటూ చురుకుగా కార్యక్రమాలు నిర్వహిస్తున్నారు. ఆయన వైసీపీపై తీవ్ర స్థాయిలో విరుచుకుపడతారు. అందుకే ఆయనపై ప్రో టీడీపీ ముద్ర పడిపోయింది. ఏపీలో మారుతున్న రాజకీయంతోనూ ఇది తప్పదన్న వాదన వినిపిస్తోంది.
