పోలవరం ముంపు మండలాలపై మళ్లీ చర్చ ప్రారంభమయింది. ఏపీలో అధికారంలో ఉన్న వైసీపీ… పోలవరం ఎత్తు తగ్గించాలనే ఆలోచన చేస్తోంది. కేంద్ర జలసంఘం ఆమోదించిన ఎత్తు మేరకు నీరు నిల్వ చేస్తే.. రూ. 30వేల కోట్లు పునరావాసానికి కావాలి. అంత పెద్ద మొత్తంలో నిధులులేవు కాబట్టి… 41 మీటర్లకుతగ్గించాలనే ఆలోచన ఏపీ సర్కార్ చేస్తోంది. అదేజరిగిదే…ఏపీలో కలిపిన ఏడు ముంపుమండలాల్లో ముంపు ఉండదు. అక్కడ పరిహారం చెల్లించాల్సిన అవసరం రాదు. కేవలం పోలవరం ప్రాజెక్ట్ వద్ద మునుగుతాయన్న ఉద్దేశంతో… భవిష్యత్లో రెండు రాష్ట్రాల మధ్య తీవ్రమైన గొడవలు వస్తాయన్న ముందుచూపుతో.. ఆ ఏడు మండలాల్ని ఏపీలో కలిపారు. ఇప్పుడు ముంపు లేకపోతే.. ఆ ఏడు మండలాలను ఏపీలో ఉంచాల్సిన అవసరం ఉండదనేది చాలా మంది వాదన.
ఏడు మండలాలను అక్రమంగా కలిపేసుకున్నారని.. చాలా రోజులుగా.. టీఆర్ఎస్ విమర్శలు చేస్తోంది. పోలవరం ప్రాజెక్ట్ నిర్మాణానికి అడ్డంకులు తొలగిస్తూ తెలంగాణ ప్రాంతంలోని ఏడు ముంపు మండలాలను….2014లో ఏపీలో కలిపింది కేంద్రం. ఈ విలీనాన్ని తెలంగాణ ఉద్యమ సంఘాలు, టీఆర్ఎస్ నేతలు తీవ్రంగా వ్యతిరేకించారు. అప్పట్లోనే రాముడి ఆలయం ఉన్న భద్రాచలం గ్రామాన్ని ఏపీలో విలీనం చేస్తారని ప్రచారం జరిగింది. కానీ భావోద్వేగాల ప్రాతిపదికన…భద్రాచలం గ్రామాన్ని విలీనం నుంచి మినహాయించారు. తెలుగుదేశం పార్టీ ఉన్నప్పుడు..భద్రాచలం కూడా ఏపీదేనని.. తమకు ఇచ్చేయాలని వాదిస్తూ ఉంటుంది. అదో రాజకీయవివాదంలా ఉండిపోయింది.
ముంపులేకపోతే.. ఏడు మండలాలను.. తమకు ఇచ్చేయాలని తెలంగాణ పట్టుబట్టకుండా ఉండదు. కేంద్ర స్థాయిలో పోరాటం చేస్తుంది. అవసరం లేనప్పుడు తెలంగాణ ఇచ్చేస్తే ఏమవుతుందని ఏపీ సర్కార్ అనుకున్నా ఆశ్చర్యం లేదు. ఎందుకంటే.. ఏపీ సర్కార్ వ్యవహారశైలి అంతే ఉంది. త్వరలో దీనికి సంబంధించి అడుగులు ముందుకుపడినా ఆశ్చర్యం లేదనే వాదన రాజకీయవర్గాల్లో వినిపిస్తోంది. ఆ ఏడు మండలాలు వెనక్కిపోతే.. ఇప్పుడు కాదు.. ఇక ఎప్పటికీ పోలవరం కలగానే మిగిలిపోతుంది.
