మళ్లీ పెళ్లి.. ప్రేక్షకుల ముందుకు వచ్చేసింది. ఈ సినిమాలో ఏం ఉంటుందన్నది అందరికీ మందే తెలుసు. ఇది నరేష్ – పవిత్రా లోకేష్ జీవితాల్లో జరిగిన కొన్ని సంఘటనల సమాహారం. టీజర్, ట్రైలర్ చూసిన వాళ్లకెవరికైనా ఈ విషయం ఈజీగా అర్థం అవుతుంది. సినిమాల్లోనూ అదే ఉంది. అయితే.. సర్ ప్రైజింగ్ విషయం ఏమిటంటే.. ఈ సినిమాలో సౌమ్య అనే పాత్రని చాలా క్రూరంగా చూపించారు. సౌమ్య అంటే.. నరేష్ మూడో భార్య రమ్య అన్నమాట. తనని ఓ సైకోగా చిత్రీకరించారు. డబ్బు మనిషిగా, భర్త ఆస్తిని దోచుకోవడానికి కుట్ర పన్నినట్టుగా చూపించారు. ఈ సినిమా చూశాక రమ్య ఎలా స్పందిస్తున్నది ఆసక్తికరంగా మారింది.
నిజానికి నరేష్ – రమ్యల వివాదం క్రమంగా తెరమరుగు అవుతోంది. నరేష్ – పవిత్రల జంట… దాదాపుగా అఫీషియల్ అయిపోయింది. రమ్య కూడా ఎలాంటి గొడవ చేయడం లేదు. ఈ నేపథ్యంలో నరేష్ మళ్లీ అనవసరంగా తేనె తుట్టెని కదిపినట్టైంది. ఈ సినిమాతో నరేష్ ఏం సాధించాడన్నది కూడా పెద్ద ప్రశ్న. తన జీవితంలో పవిత్ర ఎందుకొచ్చింది, ఎలా వచ్చింది? రమ్యతో తనకున్న విబేధాలేంటి? అనే ప్రశ్నలకు తన కోణంలో సమాధానం చెప్పడానికి ఈ సినిమా ఉపయోగపడిందంతే. ప్రతికూల అంశం ఏమిటంటే ఈ సినిమాతో రమ్య చేతికి ఓ అయుధం దొరికినట్టైంది. తన పాత్రని మరీ బీ గ్రేడ్ చేసి చూపించారని రమ్య ఆరోపిస్తే.. అందులో తప్పేం లేదనిపిస్తుంది. మరి.. రమ్య రియాక్షన్ ఏమిటో? దాని పరిణామాలేమిటో తెలియాలంటే ఇంకొన్ని రోజులు ఆగాలి.
