యంగ్ టైగర్ ఎన్టీఆర్ తీస్తున్న ప్రతి సినిమా విషయంలో ఏదో ఒక తప్పుడు సమాచారం ప్రేక్షకుల్లోకి వెళ్తుంది. అసలు ఎన్టీఆర్ సినిమాకే ఎందుకిలా జరుగుతుంది.. మిగతా హీరోలకు ఎందుకు జరుగదు అన్న ఆలోచన చేయాల్సిన అవసరం ఎంతైనా ఉంది. నాన్నకు ప్రేమతో సినిమా విషయంలో రిలీజ్ గురించి ఏం జరుగుతుందో తనకు తెలియట్లేదని.. తానే మెసేజ్ పెట్టినట్టుగా ఓ ఆకతాయి తారక్ ట్విట్టర్ ను హ్యాక్ చేసి హాట్ న్యూస్ అయ్యేలా చేశాడు.
ఇప్పుడు అదే దారిలో జనతా గ్యారేజ్ షూటింగ్ టైంలో తారక్ కు యాక్సిడెంట్ అయ్యిందని ఎన్టీఆర్ గాయాల పాలయ్యాడని రూమర్ లేపారు.. ఈసారి కూడా ఎవరో తెలియని వ్యక్తి అలా చేయడం జరిగింది. అయితే దీని వెనుక ఉన్నఅసలు కుట్రదారులెవరు.. ఎన్టీఆర్ మీద అతని సినిమాల మీదే నెగటివ్ ప్రచారం జరిగేలా ఎందుకు చేస్తున్నారు అన్నది అభిమానులు సీరియస్ గా ఆలోచించాల్సిన అవసరం ఎంతైనా ఉంది.
ప్రస్తుతం ముంబైలో షూటింగ్ జరుపుకుంటున్న ఎన్టీఆర్ కు యాక్సిడెంట్ అయ్యిందని ఫ్యాన్స్ కంగారు పడ్డారు. అలాంటిదేమీ లేదంటూ గ్యారేజ్ నిర్మాతలు ఎనౌన్స్ చేయడంతో ఊపిరి పీల్చుకున్నారు. కొరటాల శివ దర్శకత్వంలో వస్తున్న జనతా గ్యారేజ్ లో సమంత, నిత్యా మీనన్ లు కథానాయికలుగా నటిస్తున్నారు. మలయాళ సూపర్ స్టార్ మోహన్ లాల్ సినిమాలో ఓ ప్రత్యేక పాత్రలో నటించడం విశేషం. సినిమాను అనుకున్న టైంలో పూర్తి చేసి ఆగష్టు 12 కృష్ణ పుష్కరాల సందర్భంగా రిలీజ్ చేయాలనే ప్లాన్ లో ఉన్నారు దర్శక నిర్మాతలు.
