కేంద్ర ప్రభుత్వం సీబీఎస్ఈ 12వ తరగతి పరీక్షలు కూడా రద్దు చేయాలని నిర్ణయించింది. ప్రధానమంత్రి .. అత్యున్నత స్థాయి సమీక్షా సమావేశం నిర్వహించారు. ఇప్పటికే రాష్ట్ర ప్రభుత్వాల అభిప్రాయాలు తెలుసుకున్నారు. వాటన్నింటిపై సమీక్షించి.. పరీక్షల రద్దుకే ప్రాధాన్యం ఇచ్చారు. పరీక్షల కంటే విద్యార్థుల ఆరోగ్యం, భద్రత ముఖ్యమని ప్రధాని మోడీ అభిప్రాయం వ్యక్తంచేశారు. పరీక్షలు రాయాలనుకునేవారికి కరోనా ఉధృతి తగ్గాక గత ఏడాదిలానే నిర్వహించాలని నిర్ణయించారు. నిజానికి పరీక్షల నిర్వహణకే మెజారిటీ రాష్ట్రాలు మొగ్గు చూపాయి. మహారాష్ట్ర సర్కార్ రద్దు చేయాలనగా.. వ్యాక్సినేషన్ పూర్తయిన తర్వాత పెట్టాలని కేరళ, ఢిల్లీ ముఖ్యమంత్రులు కోరారు. అందరి అభిప్రాయాలు తెలుసుకుని.. మోడీ పరీక్షలను రద్దు చేయాలని నిర్ణయించారు. టెన్త్ క్లాస్ పరీక్షలను సీబీఎస్ఈ కూడా ఎప్పుడో రద్దు చేసింది. ఇంటర్నల్ అసెస్మెంట్ ద్వారా జీపీఎలు ప్రకటించబోతోంది.
అయితే ఏపీ సర్కార్ మాత్రం ఇంత వరకూ టెన్త్ పరీక్షలు కూడా రద్దు చేయలేదు. ఆరు నూరైనా టెన్త్, ఇంటర్ పరీక్షలు నిర్వహిస్తామని ప్రకటించేసింది. మరో వైపు జూన్ చివరి వరకూ సెలవులు ప్రకటించేసింది. అంటే.. జరిగితే.. జూలైలోనే. పరీక్షలు నిర్వహించి.. ఫలితాలు ప్రకటించేసరికి జూలై పూర్తి అయిపోతుంది. అంటే ఆగస్టు వస్తుంది. పదో తరగతి పరీక్షలపై ఇతర రాష్ట్రాలు,కేంద్రం కూడా తేల్చేశాయి.పరీక్షలు రద్దు చేసి ఇంటర్నల్ అసెస్మెంట్ ద్వారా జీపీఏలు ప్రకటించేసిన తెలంగాణ ప్రభుత్వం.. ఇంటర్ ఆన్ లైన్ క్లాసులకు కూడా గ్రీన్ సిగ్నల్ ఇచ్చింది. జూన్ మొదటి వారంలో తెలంగాణ ఇంటర్ అకడమిక్ ఇయర్ ప్రారంభం కాబోతోంది. వచ్చే విద్యా సంవత్సరం నష్టపోకుండా ప్రణాళికతో ముందడుగు వేస్తున్నారు.
పరీక్షలు రాయకపోతే విద్యార్థుల భవిష్యత్ కోసం పరీక్షలంటూ ఏపీ సర్కార్ వాదనలు వినిపిస్తోంది. టెన్త్ పరీక్షలు రద్దు చేయాలని విద్యారంగ నిపుణుల సూచనలు చేస్తున్నారు. పిల్లలను కాపాడుకోవాల్సిన అవసరం ఉందన్న వాదనలు వినిపిస్తున్నాయి. టెన్త్ పరీక్షలు పెట్టకపోయినా విద్యార్థులకు భవిష్యత్లో పెద్దగా ఇబ్బంది ఉండదని.. ఇంటర్ సెకండియర్ పరీక్షలు ముఖ్యమని.. కాస్త ఆలస్యమైనా పెట్టాలనే సూచనలు చేస్తున్నారు. కేంద్ర ప్రభుత్వం ప్రధాని మోడీ కూడా… విద్యార్థుల ఆరోగ్యమే ముఖ్యమని భావిస్తున్నారు. ధర్డ్ వేవ్ పిల్లలపైనే ఎక్కువగా విరుచుకుపడబోతోందన్న విశ్లేషణల మధ్య ఆయన చురుకైన నిర్ణయం తీసుకున్నారు. కానీ ఏపీ సర్కార్ మాత్రం.. ఏదో తెలియని పట్టుదలతో ముందుకు పోతోంది. ఏం జరిగితే అది జరుగుతుంది.. తమకేమిటీ అన్న భావనలో ఉంది.
