జీవితంలో ఎత్తు పల్లాలన్నీ చవి చూసిన నటుడు జగపతిబాబు. అంతా అయిపోయిందనుకున్న తరుణంలో.. మళ్లీ లేచి – ఇక ఎదురు లేదు అనుకున్నప్పుడు బొక్కబోర్లా పడి, మళ్లీ నిలదొక్కుకుని.. ఇలా.. పడుతూ లేస్తూ తన ప్రయాణం కొసాగించాడు. అపర కోటీశ్వరుడి స్థాయి నుంచి.. చేబులో చిల్లర లేని స్థితికి చేరిపోయాడు. డబ్బు రావడం, పోవడం.. తన జీవితంలో చాలా కామన్. అయితే జీవితాన్ని మాత్రం పరిపూర్ణంగా అనుభవించాడు. తన జల్సాలు, తప్పొప్పులు, నడిపిన ప్రేమాయణాలు ఏదీ దాచుకోడు. అడగాలే గానీ, ప్రతీ ఇంటర్వ్యూలోనూ నిస్సంకోచంగా పూస గుచ్చినట్టు వివరిస్తాడు.
ఇప్పుడు జగపతి బాబు నుంచి ఓ సిరీస్ రాబోతోంది. అదే.. సముద్రం. ఇందులో జగ్గూభాయ్ తన జీవితాన్ని మరోసారి ఆవిష్కరించుకోబోతున్నాడు. ఇదంతా… జగ్గూతో ముఖాముఖి కార్యక్రంలా ఉండబోతోంది. ఓ సిరీస్ లో కొన్ని ఇంటర్వ్యూలు రాబోతున్నాయి. అందులో ఇప్పటి వరకూ ఎవ్వరికీ చెప్పని అంశాల్ని చెప్పబోతున్నాడు. తన అలవాట్లు. సౌందర్యకి సైట్ కొట్టిన సంగతి, మాఫియాతో జరిగిన సంగతులు, పాప పాలుకి కూడా డబ్బులు లేని దుస్థితి.. ఇలా ఒక్కటేమిటి.. చాలా విషయాల్ని పంచుకోబోతున్నాడు. నిజానికి `సముద్రం` పేరుతో ఓ వెబ్ సిరీస్ చేయాలన్నది జగ్గూభాయ్ ఆలోచన. తన జీవితాన్ని అందులో పాత్రల ద్వారా ఆవిష్కరించాలనుకున్నాడు. కానీ… అది కుదరకపోవడంతో, ఇలా ఇంటర్వ్యూలతో సరిపెట్టుకుంటున్నాడు. అయితే ఈ ఇంటర్వ్యూలలో జగ్గూభాయ్ తో పాటు చాలామంది జీవిత రహస్యాలు బయటకు వచ్చే అవకాశం ఉంది. ఒక్క ఇంటర్వ్యూ బయటకు వస్తే.. అందులో ఎంత షాకింగ్ విషయాలు ఉన్నాయో అర్థం అవుతుంది. మొత్తానికి ఓ నటుడు తనకు తానుగా.. ఓ సిరీస్ ఆఫ్ ఇంటర్వ్యూస్ ఇవ్వాలనుకోవడం, అందులో ఏ టూ జెట్ విషయాల్ని పంచుకోవాలనుకోవడం సాహసమే
