వివాదం ఎక్కడుంటే కమల్హాసన్ అక్కడుంటాడో, లేదంటే కమల్ చుట్టూనే వివాదాలు తిరుగుతాయో తెలీదు గానీ… కమల్ – వివాదం రెండూ పెనవేసుకుపోయే విషయాలే. కమల్ విశ్వరూపంతో ఎంత సంచలనం సృష్టించాడో తెలిసిన విషయమే. ‘దేశం వదిలిపెట్టి పోతా’ అంటూ హెచ్చరించే స్థాయికి వెళ్లిపోయాడు అప్పట్లో. అయితే ఈ గొడవ అక్కడితో ఆగేది కాదు. ఎందుకంటే ‘విశ్వరూపం 2’ కూడా ఉంది. పార్ట్ 2లో కమల్ ఇంకెంత కెలికేస్తాడో అని అందరూ భయపడిపోయారు. ‘ఇదిగో వస్తున్నా… అదిగో వస్తున్నా’ అంటూ కమల్కూడా ఊరించాడు. కానీ ఆ సినిమా విడుదల కాలేదు. అప్పట్లో ఉన్న పరిస్థితులు విశ్వరూపం సినిమాకి అడ్డుగా నిలిస్తే, ఆ తరవాత ఆర్థిక పరమైన కారణాల వల్ల విశ్వరూపం వాయిదా పడుతూ వస్తోంది. ఆ సినిమాని జనం మర్చిపోతున్న దశలో… కమల్ మేల్కొలపడానికి సిద్ధమయ్యాడు.
అవును… విశ్వరూపం 2 విడుదలకు సిద్ధమైంది. ఈ సినిమాకి మోక్షం లభించినట్టు టాక్. ఆర్థిక పరమైన ఇబ్బందులు ఒకొక్కటీ తొలగించుకొంటూ వస్తున్న కమల్.. దీపావళికి ఈ సినిమాని రిలీజ్ చేయడానికి రెడీ అయ్యాడని తెలుస్తోంది. విశ్వరూపం సమయంలో తమిళనాట కమల్కి వ్యతిరేకంగా ఓ చిన్నసైజు ఉద్యమమే సాగింది. ప్రభుత్వంపై కమల్ కూడా విరుచుకుపడ్డాడు. మరి విశ్వరూపం 2 ఇంకెన్ని సంచలనాలకు కేంద్రబిందువు అవుతుందో చూడాలి.
