దర్శకుడు వినాయక్ హీరోగా మారాలనుకున్న సినిమా `శీనయ్య`. దిల్ రాజు ప్రొడక్షన్లో ఈ సినిమా తెరకెక్కడం, వినాయక్ హీరోగా దర్శనమివ్వడం ఈ సినిమాపై క్రేజ్ పెంచాయి. అయితే ఈ సినిమా ఆగిపోయిందని, కథ సరిగా లేకపోవడం వల్ల – పక్కన పెట్టేశారని వార్తలొచ్చాయి. వినాయక్ కూడా ఈ కథపై అసంతృప్తితో ఉన్నాడని, అందుకే ఈ సినిమా వదులుకుని, దర్శకత్వంవైపు దృష్టి పెట్టబోతున్నాడని చెప్పుకున్నారు.
అయితే… అలాంటిదేం లేదు. ఈ సినిమా కొత్త షెడ్యూల్ మొదలవుతోంది. ఈనెల 28 నుంచి హైదరాబాద్లో శీనయ్య కొత్త షెడ్యూల్ మొదలు కాబోతోంది. కథపై కాస్త అసంతృప్తి , కొన్ని అనుమానాలు రేగిన మాట వాస్తవమే. అయితే దిల్ రాజు తన డైరెక్షన్ టీమ్ని కూర్చోబెట్టి లోపాల్ని సరిదిద్దుకుంటూ వెళ్లాడట. ఇప్పుడు స్క్రిప్టు బాగా వచ్చిందని, ఆ నమ్మకంతోనే సినిమాని మొదలెడుతున్నారని తెలుస్తోంది. పైగా వినాయక్ హీరోగా అంగరంగ వైభవంగా ఆరంభమైన సినిమా ఇది. మధ్యలో ఆగిపోతే… అది వినాయక్ ఇమేజ్కే డామేజ్. అందుకే… ఎట్టిపరిస్థితుల్లోనూ ఈ సినిమాని పూర్తి చేయాలని వినాయక్ భావించాడట. అందుకే.. ఈ సినిమా మళ్లీ పట్టాలెక్కిందని తెలుస్తోంది.
