రాజకీయాల్లో ఉంటే సంపాదించుకోవడమే అనుకుంటారు అందరూ. కానీ రాజకీయాల కారణంగా సర్వం కోల్పోయిన వారు కూడా ఎంతో మంది ఉంటారు. అయితే పై స్థాయి వారు కాదు. ఎందుకంటే సంపాదిచుకోవడం తెలిసిన వారే పై స్థాయికి వెళ్తారు. కానీ కింద రాజకీయాల మోజుతో వచ్చేవారు ఎంతో మంది రోడ్డున పడిపోతూంటారు. ఇలాంటి వారు ఎక్కువగా గ్రామ రాజకీయాల్లో ఉంటారు. ప్రస్తుతం తెలంగాణలో పంచాయతీ ఎన్నికలు జరుగుతున్న సమయంలో ఈ అంశం మరోసారి హాట్ టాపిక్ అవుతోంది.
ఆస్తులు కరగబెట్టుకుంటున్న గ్రామ స్థాయి నేతలు
గ్రామాల్లో డబ్బులను కాకుండా.. ఆధిపత్యాన్ని తమ ఆస్తిగా భావిస్తూంటారు కొంత మంది. అలాంటి వారిని రాజకీయాలు ఓ ఆట ఆడుకుంటాయి. ఊరిపై పెత్తనం కోసం సర్పంచ్ పదవిని లక్షలు, కోట్లు పెట్టి వేలం పాటలో పాడుకుంటారు. కానీ వారికి రూపాయి కూడా తిరిగి రాదు. ఒక వేళ పోటీ జరిగితే పోటీ పడిన వారు అందరూ ఖర్చు అయిపోతారు. గెలిచిన వాడు కూడా ఇంటికెళ్లి ఏడుస్తాడు. ఒక సారి దిగిన తర్వాత ఆస్తులన్నీ కరగబెట్టుకోవాల్సిందే.
అందరూ సంపాదించలేరు.. నష్టపోయేవారు ఎక్కువ
ఇప్పుడు పంచాయతీలకు వచ్చే నిధులు నేరుగా సర్పంచ్ ఖాతాకు రావు. పనులు చేసినా వాటిలో మిగిలేదేమీ ఉండదు. ప్రజాస్వామ్యంలో ప్రజాధనం నుంచి రూపాయి కూడా సంపాదించుకోలేరు. ఎప్పుడో ఓ సారి దొరికిపోతారు. ఇక్కడ ఓ విషయాన్ని చిన్న రాజకీయ నేతలు గుర్తుంచుకోవాలి.. పెద్ద స్కాములు చేస్తే హీరోలంటున్నారు కానీ గ్రామస్థాయిలో స్కాములు చేస్తే దొంగ అంటారు. అందుకే .. పట్టుదల కోసం గ్రామాల్లో రాజకీయాలు చేసేవారు అవినీతి చేయలేరు. కానీ పట్టుదల కోసం ఆస్తులు కరగబెట్టుకుని రాజకీయాలు చేస్తూంటారు.
డబ్బు అవసరం లేని రాజకీయాలు చేస్తేనే ప్రయోజనం
ఓ రాష్ట్రానికి ముఖ్యమంత్రి అయినా తన సొంత గ్రామంలో రాజకీయాలు చేయాలంటే చేయలేరు. అంత క్లిష్టంగా గ్రామ రాజకీయాలు ఉంటాయి. అందరూ కలిసే ఉన్నా అంతర్గతంగా ఎన్నో రాజకీయాలు చేసుకుంటారు. అందుకే ఈ రాజకీయాల్లోకి దిగి నష్టపోయిన ఎంతో మంది.. అసలు అలాంటి పదవుల జోలికివెళ్లవద్దని సలహాలిస్తున్నారు. అయితే రాజకీయాలను డబ్బుతో చేయాలనుకుంటే మాత్రమే రావొద్దు. సర్పంచ్గా నిజాయితీగా పని చేయాలనుకుంటే.. ప్రజల మద్దతు కూడగట్టగిగితే .. అది ఊరికి సేవ చేసినట్లే అవుతుంది. అలాంటి రాజకీయాలు చేస్తే ఎవరూ నష్టపోరు.. ఊరే బాగుపడుతుంది.
