చియాన్ విక్రమ్ గురించి ప్రత్యేకంగా పరిచయం చేయొక్కర్లెద్దు. ప్రయోగాలంటే ప్రాణం ఇచ్చేస్తాడు విక్రమ్. పాత్ర కోసం ఏం చేయమన్నా చేస్తాడు. ఎంత రిస్క్ అయినా రెడీ అయిపోతాడు. అందుకే కొత్తరకం సినిమాలు కోరుకొనే ప్రేక్షకులు… విక్రమ్కి అభిమానులుగా మారిపోతారు. అయితే ఎంత ప్రతిభ ఉండి ఏం లాభం? సరైన హిట్ లేనప్పుడు. అపరిచితుడు తరవాత విక్రమ్ ఎన్ని ప్రయత్నాలు చేసినా మెప్పించలేకపోయాడు. ఆఖరికి ఐ కూడా ఘోర పరాజయాన్ని చవిచూసింది. ఆ తరవాత కూడా ఫ్లాపుల పరంపర కొనసాగింది. ఇప్పుడు విక్రమ్ చేతిలో ఉన్న సినిమా… ఇరుముగన్. నయనతార, నిత్యమీనన్ కథానాయికలుగా నటించిన చిత్రం షూటింగ్ పూర్తయ్యింది. తెలుగులో ఇంకొక్కడు పేరుతో విడుదల చేస్తారు.
టీజర్ చూస్తుంటే… ఈసారీ విక్రమ్ ఓ కొత్త రూటులోనే సినిమా చేసినట్టు అర్థమవుతోంది. ఇదో సైన్స్ ఫిక్షన్ స్టోరీ అట. కథానాయకుడు చేసే వెరైటీ ప్రయోగాలే.. ఈ కథకు మూలం. విక్రమ్ తన ప్రభావాన్ని కోల్పోయి చాలా కాలం అయ్యింది. అయినా సరే.. ప్రేక్షకుల్లో మాత్రం ఆశ చావలేదు. ఈసారైనా విక్రమ్ అపరిచితుడు రేంజులో మ్యాజిక్ చేస్తాడేమో అని ఎదురుచూస్తున్నారు. విక్రమ్కి ఈ ఇంకొక్కడు అనేది ఆఖరి అవకాశం. ఈసారి కొట్టలేదో.. ఇక అంతే. అందుకే విక్రమ్ కూడా సర్వశక్తులూ ఒడ్డి ఈ సినిమా చేశాడట. మరి ఈ అపరిచితుడికి ఈసారైనా హిట్టు దక్కుతుందో, లేదో?
