ఈమధ్య డబ్బింగ్ సినిమాలపై పెద్దగా గురి కుదరడం లేదు. కేజీఎఫ్ లాంటి సినిమాలకు తప్ప.. దేనికీ క్రేజ్ రావడం లేదు. ఆఖరికి… విజయ్ `బీస్ట్` ని కూడా జనం పట్టించుకోలేదు. వచ్చిన డబ్బింగులన్నీ… వచ్చినట్టుగానే వెనక్కిపోతున్నాయి. ఈ నేపథ్యంలో ఓ డబ్బింగ్ సినిమా తన ట్రైలర్తో కాస్త ఆసక్తిని పెంచేలా చేసింది. అదే.. K R K. అంటే కన్మణి, రాంబో, కతిజా…
విజయ్సేతుపతి నటించిన చిత్రమిది. నయనతార, సమంత కథానాయికలు. నయనతార ప్రియుడు విఘ్నేష్ శివన్ దర్శకత్వం వహించారు. విజయ్ సేతుపతి, సమంత, నయన.. ముగ్గురూ స్టార్లే. కాబట్టి.. ఈ సినిమాకి తమిళనాట క్రేజ్ బాగుంది. ఇప్పుడు ట్రైలర్ రిలీజ్ చేశారు. ఆ ట్రైలర్ ఆసక్తికరంగా, సరదాగా, వెరైటీగా సాగింది. ఇదో కాంబో ప్రేమకథ. ఇద్దరమ్మాయిల్ని ఒకేసారి ప్రేమలోకి దింపే ప్రేమికుడిగా విజయ్ కనిపించాడు. ఖుషిలో.. గుళ్లో ఆరిపోతున్న దీపానికి చేతులు అడ్డుపెడుతూ హీరో, హీరోయిన్లని పరిచయం చేసిన సీన్ ఉంది కదా.. అలాంటిదే… ఈ సినిమాలోనూ ఉంది. అయితే.. ఈసారి దీపానికి నాలుగు కాదు.. ఆరు చేతులు అడ్డుపడతాయి. ఆసీన్తోనే కథ ఏ కోణంలో సాగుతుందన్న విషయాన్ని చెప్పేశాడు దర్శకుడు. టైటానిక్ సీన్ ని.. కాపీ చేస్తూ.. చూపించిన షాట్ కూడా ఆకట్టుకునేదే. `నన్ను పెళ్లి చేసుకున్నాడు..` అని నయన అంటే.. `నాతో పడుకున్నాడు..` అని సమంత డైలాగ్ ఉంది. అదే.. ఈ సినిమాలో ఇంట్రస్టింగ్ పాయింట్. అనిరుథ్ ఇచ్చిన బ్యాక్ గ్రౌండ్ స్కోర్ బాగుంది. ఫన్ రైడ్ తో సాగే కథ అని ట్రైలర్తోనే అర్థమవుతోంది. కాకపోతే. `ఆచార్య`తో పోటీగా తెలుగులో విడుదల అవుతున్న సినిమా ఇది. అదొక్కటే ఇబ్బంది పెట్టే విషయం.
