ఈరోజు విజయ్ సేతుపతి బర్త్ డే. తమిళంలో తనో పెద్ద స్టార్. తెలుగులోనూ అభిమానుల్ని ఏర్పరచుకుంటున్నాడు. అయితే.. తన పుట్టిన రోజున అనుకోని వివాదంలో పడ్డాడు విజయ్ సేతుపతి. ఆ తరవాత.. తన అభిమానులకు `సారీ` చెప్పడంతో- గొడవ సద్దుమణిగింది.
అసలేం జరిగిందంటే… ఈరోజు విజయ్ సేతుపతి పుట్టిన రోజు సందర్భంగా.. సెట్లో కేక్ కట్ చేశాడు. వెరైటీ కోసమని.. ఓ పెద్ద కత్తి తీసుకొచ్చి – కేక్ కోసేశాడు. ఆ ఫొటోలూ, వీడియోలూ సోషల్ మీడియాలో వైరల్ అయ్యాయి కూడా. అయితే కొంతమంది అభిమానులు, ప్రజా సంఘాలూ విజయ్ కత్తితో కేక్ కొయ్యడంలోనూ తప్పులు వెదికారు. `గుండాల మాదిరిగా.. ఇలా కత్తులతో కేక్లుకట్ చేయడమేంటి? పుట్టిన రోజునాడు అభిమానులకు ఎలాంటి సందేశాన్ని ఇవ్వదలచుకున్నారు` అంటూ.. ఎదురు దాడికి దిగారు. తన అభిమానులే హర్ట్ అయిపోవడంతో.. విజయ్ తన తప్పుని సరిదిద్దుకునే ప్రయత్నం చేశాడు. కేక్ ని అలా కట్ చేసినందుకు `సారీ` చెబుతూనే అందుకు గల కారణాన్ని వివరించాడు. తాను ప్రస్తుతం `పొన్రం` అనే ఓ తమిళ సినిమాలో నటిస్తున్నానని, అందులో ఖడ్గానికి చాలా ప్రాధాన్యం ఉందని, అందుకే అలా కత్తితో కేక్ కట్ చేయాల్సివచ్చిందని చెప్పుకొచ్చాడు. ఈ వ్యవహారంలో ఎవరైనా ఇబ్బంది పడి ఉంటే.. క్షమించాలని కోరాడు. విజయ్ ఏదో అనుకుంటే.. ఇంకేదో అయ్యింది మేటరు. సోషల్ మీడియాలో జనాలు ఇలానే ఉంటారు. ఎప్పుడు ఏ విషయాన్ని నెగిటీవ్ కోణంలో చూస్తారో అస్సలు ఊహించలేం. ఈ విషయం.. విజయ్ సేతుపతికి ఇప్పుడు తెలిసి ఉంటుంది.
