పబ్లిసిటీ కోసం చేస్తున్నాడో, లేదంటే ఈగో హ‌ర్ట‌యి ఇలా ప్ర‌వ‌ర్తిస్తున్నాడో తెలీదు గానీ – విశ్వ‌క్ సేన్ ర‌చ్చ ర‌చ్చ చేస్తున్నాడు. త‌ను ద‌ర్శ‌క‌త్వం వ‌హిస్తూ, హీరోగా న‌టించి నిర్మించిన `ఫ‌ల‌క్ నుమాదాస్‌`కి ఎలాక్కావాలంటే అలా ప‌బ్లిసిటీ ర‌ప్పించేసుకున్నాడు విశ్వ‌క్‌. ఆ సినిమా ప్రీ రిలీజ్ ఫంక్ష‌న్లో విజ‌య్ దేవ‌ర‌కొండ‌పై ప‌రోక్షంగా సెటైర్లు వేస్తూ రౌడీ ఫ్యాన్స్‌ని రెచ్చ‌గొట్టాడు. వాళ్లేమో సినిమా చూసి `ఇదేం సినిమా` అంటూ ట్రోళ్ల‌మీద ట్రోళ్లు చేస్తూనే ఉన్నారు. ఇవ‌న్నీ చూస్తూ.. విశ్వ‌క్ మండిప‌డుతున్నాడు. విజ‌య్ ఫ్యాన్స్ అంతు చూస్తానంటూ… రెచ్చిపోయి మ‌రీ స్టేట్మెంట్లు ఇస్తున్నాడు. ఈరోజు.. హైద‌రాబాద్‌లో ఓ ప్రెస్ మీట్ కూడా పెడుతున్నాడ‌ట‌. ఈ ప్రెస్ మీట్ ఉద్దేశం… ఈ గొడ‌వ‌ని మ‌రింత కెలుక్కోవ‌డ‌మే అని టాక్‌. సినిమా ఇప్ప‌డు థియేట‌ర్ల‌లో ఉంది. ఇప్పుడు ఏం మాట్లాడినా – త‌న సినిమాకి ప‌బ్లిసిటీనే. అందుకే విశ్వ‌క్ క‌య్యానికి కాలు దువ్వుతున్నట్టు అనిపిస్తోంది.

హీరో ఫ్యాన్స్ మ‌ధ్య గొడ‌వ‌లు జ‌ర‌గ‌డం మామూలే. చిరంజీవి – బాల‌య్య ఫ్యాన్స్ మ‌ధ్య‌యితే లెక్క‌లేన్ని సార్లు గొడ‌వ‌లు జ‌రిగాయి. లేటెస్ట్‌గా ప‌వ‌న్ – ప్ర‌భాస్ ఫ్యాన్స్ మ‌ధ్య కూడా ఇలాంటివే న‌డుస్తున్నాయి. అయితే హీరోలెవ‌రూ మైకులు ప‌ట్టుకుని – త‌మ ఫ్యాన్స్‌ని రెచ్చ‌గొట్ట‌లేదు. అస‌లు ఆ గొడ‌వ‌ల‌కూ, త‌మ‌కూ సంబంధం లేన‌ట్టే వ్య‌వ‌హ‌రించారు. రెండు సినిమాలు చేశాడో లేదో… విశ్వ‌క్ – త‌న‌కంటూ ఓ పెద్ద ఫ్యాన్స్ ఫాలోయింగ్ ఉంద‌న్న భ్ర‌మ‌లో ఉన్నాడు. ఉంటే ఉన్నాడు… ఇలా మైకు ప‌ట్టుకుని – రెచ్చిపోవ‌డం ఏమిటో అర్థం కాదు. ఇన్ స్ట్రాగ్రామ్‌లో బాక్సాఫీసుపై కూసిన కూత‌కి ఇప్ప‌టికే ఇండ్ర‌స్ట్రీలో చాలామంది విశ్వ‌క్ యాటిట్యూడ్ గురించి నెగిటీవ్‌గా మాట్లాడుకోవ‌డం మొద‌లెట్టారు. వాటిని ప‌ట్టించుకోకుండా ఇలా పేట్రేగిపోతే – ప‌బ్లిసిటీ అయితే వ‌స్తుంది. కానీ.. విశ్వ‌క్ ఇమేజ్‌పై, త‌న కాండెక్ట్ స‌ర్టిఫికెట్‌పై ఓ మ‌చ్చ ప‌డిపోతుంది. అప్పుడు చేసేదేం ఉండ‌దిక‌.