కొన్ని కాంబినేష‌న్ల కోసం సినీ అభిమానులతో పాటు చిత్ర‌సీమ కూడా గుడ్ల‌ప్ప‌గించి చూస్తుంటుంది. అలాంటి కాంబో…. విజ‌య్ దేవ‌ర‌కొండ – త‌రుణ్ భాస్క‌ర్‌. ‘పెళ్లిచూపులు’ సినిమాతో ఓ ట్రెండ్ సెట్ చేశారు వీరిద్ద‌రూ. ఈ సినిమా చాలామందికి హోప్ ఇచ్చింది. చిన్న సినిమా రూపు రేఖ‌లు మార్చింది. చాలా జీవితాలు ఈ సినిమాతో సెటిల్ అయ్యాయి. ఆ త‌ర‌వాత విజ‌య్ దేవ‌ర‌కొండ స్టార్ హీరో అయిపోయాడు. త‌రుణ్ ద‌ర్శ‌కుడిగా త‌న మార్క్ సినిమాలు చేసుకొంటూ వెళ్లాడు. ఈ సినిమాకు ప‌ని చేసిన ప్ర‌తీ ఒక్క‌రూ ఇప్పుడు బిజీ బిజీగా ఉన్నారు. అయితే ‘పెళ్లి చూపులు’ త‌ర‌వాత విజ‌య్ – త‌రుణ్ కాంబోలో సినిమా రాలేదు. ఇప్పుడు అందుకు రంగం సిద్ధ‌మ‌వుతోంది.

త‌రుణ్ భాస్క‌ర్ ద‌ర్శ‌క‌త్వంలో విజ‌య్ హీరోగా ఓ సినిమా రూపుదిద్దుకోనుంది. ఇప్ప‌టికే త‌రుణ్ భాస్క‌ర్ క‌థ వినిపించేశాడు. విజ‌య్ కూడా `ఓకే` చెప్పాడు. త‌రుణ్ ఇప్ప‌టి వ‌ర‌కూ చిన్న‌, మీడియం రేంజ్ సినిమాలు చేస్తున్నాడు. ఈ సినిమాతో పంథా మార్చబోతున్న‌ట్టు స‌మాచారం. యాక్ష‌న్‌తో పాటు, త‌రుణ్ స్టైల్ ఆఫ్ కామెడీ టింజ్ ఉన్న సినిమా ఇది. భారీ బడ్జెట్ అవ‌స‌రం. ఈ కాంబోలో సినిమా చేయ‌డానికి చాలామంది నిర్మాత‌లు సిద్ధంగా ఉన్నారు. విజ‌య్ కూడా కొంత‌మంది నిర్మాత‌ల ద‌గ్గ‌ర అడ్వాన్స్ తీసుకొన్నాడు. వాళ్ల‌లో ఈ ప్రాజెక్ట్ ఎవ‌రి చేతికి వెళ్తుందన్న‌ది ఆస‌క్తిక‌రం.