పూరి జ‌గ‌న్నాథ్ – విజ‌య్ దేవ‌ర‌కొండ కాంబినేష‌న్‌లో ఓ సినిమా రూపుదిద్దుకుంటున్న సంగ‌తి తెలిసిందే. విజ‌య్ న‌టిస్తున్న తొలి పాన్ ఇండియా ప్రాజెక్టు ఇది. క‌థ ప్ర‌కారం సినిమా మొత్తం ముంబైలోనే జ‌ర‌గాలి. త్వ‌ర‌లోనే ముంబైలో ఓ భారీ షెడ్యూల్‌కి ప్లాన్ చేశాడు పూరి. అయితే ముంబైలో ప‌రిస్థితులు అంత అనుకూలంగా లేవ‌ని ఆ నిర్ణ‌యాన్ని మార్చుకున్న‌ట్టు స‌మాచారం. ముంబై షెడ్యూల్‌లో తీయాల్సిన స‌న్నివేశాల్ని.. రామోజీ ఫిల్మ్‌సిటీలో లాగించేయాల‌ని ప్లాన్ చేస్తున్నార్ట‌. ఇందుకోసం ఫిల్మ్‌సిటీలో సెట్ వేయాల‌ని పూరి భావిస్తున్న‌ట్టు స‌మాచారం. విజ‌య్ దేవ‌ర‌కొండ కూడా హైద‌రాబాద్ వ‌దిలి, బ‌య‌ట‌కు అడుగుపెట్ట‌డానికి అంగీక‌రించ‌డం లేద‌ని, క‌రోనా భ‌యాల దృష్టిలో ఉంచుకుని, ముంబై షెడ్యూల్‌ని పూరి పూర్తిగా ప‌క్క‌న పెట్టేశాడ‌ని టాక్‌. హిందీ చిత్ర రంగ‌మే.. ఇప్పుడు ముంబైలో షూటింగులు చేసుకోలేక‌, ఫిల్మ్‌సిటీకి ప‌రిమిత‌మైంది. రామోజీ ఫిల్మ్‌సిటీలో ఇప్పుడు బాలీవుడ్ సినిమాలు విరివిగా చిత్రీక‌ర‌ణ జ‌రుపుకుంటున్నాయి. ఇలాంటి ద‌శ‌లో ఇక్క‌డి నుంచి ముంబై వెళ్లి షూటింగ్ చేయ‌డం క‌రెక్ట్ కాద‌ని పూరి ఈ నిర్ణ‌యం తీసుకున్నాడ‌ట‌. త్వ‌ర‌లోనే సెట్ ప‌ని పూర్తి చేసి, రంగంలోకి దిగాల‌ని పూరి భావిస్తున్నాడు.