టెన్త్ మాల్ ప్రాక్టీస్ కేసులో నారాయణ విద్యా సంస్థల ఫౌండర్ చైర్మన్ నారాయణను అరెస్ట్ చేశారు. అసలు ఎక్కడో వాట్సాప్లో ప్రశ్నాపత్రం షేర్ అయితే నారాయణకు ఏంటి సంబంధం.. ఎలా అరెస్ట్ చేస్తారనే డౌట్ రావడం సహజం. అక్కడ చిత్తూరు పోలీసులు తమదైన మెకానిజం చూపించారు. తిరుపతిలో టెన్త్ ప్రశ్నాపత్రం వాట్సాప్లో షేర్ చేసిన వారిలో తిరుపతి నారాయణ కాలేజీ వైస్ ప్రిన్సిపాల్ గిరిధర్ రెడ్డి ఉన్నారు. అయన దగ్గర నుంచి పోలీసులు వాంగ్మూలం తీసుకున్నారు.,
మాజీ మంత్రి నారాయణ ప్రోద్భలంతోనే పేపర్ లీక్ చేసినట్లు ఆయన విచారణలో చెప్పారట. ప్రతీసారి పరీక్షలకు ముందు ఆయన విద్యా సంస్థల సిబ్బందితో సమావేశమై పేపర్లను లీక్ చేయాలని చెబుతారట. ఇలా గిరిధర్ రెడ్డి చాలా చెప్పారని.. అందుకే నారాయణ బండారం బయటపడిందని సజ్జల లాంటి వాళ్లు తీగ లాగేశామని చెబుతున్నారు. ఈ ఘటనలో మొత్తంగా చిత్తూరు వన్ టౌన్ పోలీసులు ఏడుగురిని అరెస్ట్ చేశారు. వీరిలో ఇద్దరు ప్రభుత్వ టీచర్లు ఉన్నారు. మిగిలిన వారు నారాయణ, శ్రీ చైతన్య, చైతన్య కృష్ణ రెడ్డి, ఎన్ఆర్ఐ విద్యాసంస్థల్లో పనిచేస్తున్న వారు. ఆయా కాలేజీల చైర్మన్లను అరెస్ట్ చేశారో లేదో స్పష్టత లేదు.
నారాయణ రెండేళ్ల కింటే కాలేజీల నిర్వహణ బాధ్యతల నుంచి వైదొలిగారు. ఆయన ప్రస్తుతానికి ఫౌండర్ చైర్మన్ మాత్రమే. నారాయణలో యాభై వేల మంది స్టాఫ్ ఉంటారు. రకరకాల హోదాలతో ఉన్నవారు ఉంటారు. వైస్ ప్రిన్సిపాల్ అంటే.. ఆయన కనీసం జోనల్ ఇంచార్జ్తో కూడా టచ్లో ఉండరు. అలాంటిది నేరుగా నారాయణతోనే డీల్ చేశారంటే ఎవరు నమ్ముతారు. కానీ పోలీసులు ఆ వాంగ్మూలం ఇచ్చారని నేరుగా నారాయణనే అరెస్ట్ చేశారు. వాంగ్మూలం సృష్టించుకున్నారన్న ఆరోపణలు వస్తాయని తెలిసినా వెనుకడుగు వేయలేదు.
నిన్నటి నుంచి హైకోర్టుకి వేసవి శెలవులు. వెకేషన్ బెంచ్ వారానికి ఒక్క రోజే అదీ గురువారం పని చేస్తుంది . మంగళవారం నాడు అప్లై చేస్తే బెంచ్ మీదకి గురువారం వస్తుంది. ఈ రోజు మంగళవారం కేస్ పెట్టి అరెస్టు చేశారు కాబట్టి అప్లై చేసుకోవడానికి కుదరదు. వచ్చే మంగళవారం దాకా ఆగాలి. అంటే కనీసం పది రోజుల దాకా జైల్లో ఉండాలి. న్యాయం అందుబాటులో ఉండని సమయం చూసి అరెస్టులు చూపిస్తున్నారని టీడీపీ నేతలంటున్నారు.
