రీమేక్ రాజా.. మ‌న వెంక‌టేష్‌. త‌న కెరీర్‌లో ఎక్కువ‌గా రీమేక్‌లే క‌నిపిస్తాయి. అవే.. త‌న‌కు సూప‌ర్ హిట్లు అందించాయి. వెంకీ నుంచి వ‌స్తున్న మ‌రో రీమేక్ `నార‌ప్ప‌`. త‌మిళంలో విజ‌వంత‌మైన `అసుర‌న్‌` దీనికి మాతృక‌. ప్రియ‌మ‌ణి ప్ర‌ధాన పాత్ర పోషిస్తోంది. శ్రీ‌కాంత్ అడ్డాల ద‌ర్శ‌కుడు. ఈనెల 20న అమేజాన్ ప్రైమ్ ద్వారా విడుద‌ల అవుతోంది. ఇప్పుడు ట్రైల‌ర్ ని తీసుకొచ్చారు.

రెండు నిమిషాల పాటు సాగిన ట్రైల‌ర్ ఇది. `అసుర‌న్‌`లో ఉన్న వాడీ, వేడీ… ‘నార‌ప్ప‌’లోనూ క‌నిపించాయి. ఓ ఇంటెన్సిటీతో సాగిన ట్రైల‌ర్ ఇది.

”మ‌న ద‌గ్గ‌ర భూముంటే తీసేసుకుంటారు డ‌బ్బుంటే లాగేసుకుంటారు.

కానీ… చ‌దువు నొక్క‌దాన్ని మాత్రం మ‌న ద‌గ్గ‌ర్నుంచి ఎవ‌రూ తీసుకోలేరు” అనే వెంకీ డైలాగ్ లోనే ఈ క‌థ థీమ్ మొత్తం తెలిసిపోతుంది. త‌న కుటుంబానికి జ‌రిగిన అన్యాయం పై, త‌న జాతికి జ‌రుగుతున్న అవ‌మానంపై ఓ సామాన్యుడు తీర్చుకున్న ప్ర‌తీకారం ఈ క‌థ‌. ఆ సామాన్యుడి పాత్ర‌లో వెంకీ.. విశ్వ‌రూపం చూపించాడు ట్రైల‌ర్‌లో.

”రా.. న‌ర‌క‌రా.. న‌ర‌క‌రా… ఎదురు తిరిగి క‌సిగ‌
రా.. న‌ర‌క‌రా.. త‌ల‌లు ఎగ‌సి ప‌డ‌గ‌…” అంటూ సాగే బ్యాక్ గ్రౌండ్ స్కోర్‌లో వెంకీ ఊచ‌కోత కోసే విధానం, ఆ ర‌క్త‌పాతం…క‌థ‌లోని ఎమోష‌న్ కి అద్దం ప‌డ‌తాయి. ప్రియ‌మ‌ణి.. మేక‌ప్ లేకుండా న‌టించిన సినిమా ఇది. త‌ను కూడా కొత్త‌గా క‌నిపిస్తోంది. మొత్తానికి `నార‌ప్ప‌` అంచ‌నాలను అందుకునే స్థాయిలోనే ఉంద‌ని ట్రైల‌ర్ నిరూపిస్తోంది. ఫైన‌ల్ రిజ‌ల్ట్ ఎలా ఉంటుందో చూడాలి.