సరిలేరు నీకెవ్వరు తరవాత మహర్షి కాంబినేషన్ రిపీట్ అవ్వాల్సింది. కాని కొన్ని కారణాల వల్ల… ఆ సినిమా ఆగిపోయింది. వంశీ పైడిపల్లి మహేష్ కోసం ఓ కథ తయారు చేసుకున్నా, అది మహేష్ అంచనాలకు తగినట్టుగా రాకపోవడంతో ఆ సినిమాని మహేష్ పక్కన పెట్టేశాడు. చిరంజీవి 152 వ చిత్రంతో మహేష్ త్వరలోనే బిజీ కాబోతున్నాడు. పరశురామ్, అనిల్ రావిపూడి.. ఈ ఇద్దరూ మహేష్ కోసం కొత్త కథలు సిద్ధం చేస్తున్నారు.
అయితే… వంశీ మాత్రం మహేష్ సినిమాపై ఆశలు వదులుకోలేదు. `మా కాంబోకి కాస్త బ్రేక్ వచ్చిందంతే. కథ కుదురుకోగానే పట్టాలెక్కుతుంది` అంటూ సన్నిహితుల దగ్గర నమ్మకంగా చెబుతున్నాడట. మహేష్ కూడా వంశీతో అదే చెప్పాడట. `మన కాంబోలో సినిమా ఉంది. కానీ కాస్త ఆలస్యం అవుతుందంతే`అని ధైర్యం చెప్పాడట. చిరంజీవి 152వ సినిమాలో మహేష్ నటించడం నిజమే అయితే.. ఆ సినిమా కోసం తను 30 రోజుల కాల్షీట్లు ఇవ్వాల్సివస్తుంది. ఈలోగా వంశీ సరైన కథ చెప్పగలిగితే.. ఆ సినిమా పట్టాలెక్కడం ఖాయం. బహుశా… వంశీ ధైర్యం కూడా అదే కావొచ్చు. వంశీ లాంటి దర్శకుడికి `నో`చెప్పడం మహేష్ని కాస్త ఇబ్బంది పెట్టే విషయమే. ఓ దర్శకుడిగా కాకుండా, ఓ స్నేహితుడిగా వంశీ మహేష్కి దగ్గరయ్యాడు. ఈ నేపథ్యంలో వంశీకి వెన్నుదన్నుగా నిలవాలనుకుంటున్నాడు మహేష్. ఈ చిత్రసీమలో ఏదైనా జరగొచ్చు. పట్టాలెక్కాల్సిన సినిమా ఆగిపోవొచ్చు. ఆగి పోయిన సినిమా మొదలవ్వొచ్చు. వంశీ నమ్మకం కూడా అదే.
