గీతా ఆర్ట్స్కీ, మెగా హీరోలకూ ఓ సెంటిమెంట్ ఉంది. తొలి సినిమాని బయటి బ్యానర్లో చేయించి, రెండో సినిమా కి మాత్రం గీతా ఆర్ట్స్ లో లాక్ చేస్తుంటారు. రామ్ చరణ్ అంతే. చిరుత… వైజయంతీ మూవీస్ సంస్థలో చేయించారు. రెండో సినిమా `మగధీర` గీతా ఆర్ట్స్ లో వచ్చింది. సాయిధరమ్ తేజ్ తొలి సినిమా `రేయ్`… వైవిఎస్ చౌదరి నిర్మించాడు. రెండో సినిమా `పిల్లా నువ్వు లేని జీవితం` గీతా ఆర్ట్స్లో వచ్చింది. అల్లు శిరీష్ విషయంలోనూ ఇంతే. ఇప్పుడు వైష్ణవ్ తేజ్కీ ఇదే సెంటిమెంట్ ఫాలో అవుతున్నారు.
వైష్ణవ్ తేజ్ తొలి సినిమా `ఉప్పెన` విడుదలకు సిద్ధం అవుతోంది. మైత్రీ మూవీస్ ఈ చిత్రాన్ని నిర్మించింది. రెండో సినిమా మాత్రం గీతా ఆర్ట్స్ బ్యానర్ లో ఫిక్సయ్యింది. ఓ కొత్త దర్శకుడ్ని ఈసినిమాతో పరిచయం చేయబోతోంది గీతా ఆర్ట్స్. ఇప్పటికే కథ సిద్ధమైంది. `ఉప్పెన` విడుదల తరవాతే.. ఈ సినిమాకి సంబంధించిన అధికారిక ప్రకటన రానుంది.
