మహేష్ బాబు – అనిల్ రావిపూడి కాంబినేషన్లో ఓ సినిమా తెరకెక్కబోతున్న సంగతి తెలిసిందే. రష్మిక ని కథానాయికగా ఎంచుకున్నారని ప్రచారం జరుగుతోంది. ఈ చిత్రంలో ఉపేంద్ర, విజయశాంతి కీలక పాత్రలలో కనిపిస్తారని కూడా తెలుస్తోంది. ‘సన్నాఫ్ సత్యమూర్తి’ తరవాత ఉపేంద్ర ఓ తెలుగు సినిమాలో నటించడం ఇదే తొలిసారి. అయితే ఈ విషయమై ఉపేంద్రని సంప్రదించింది తెలుగు 360.
మహేష్ సినిమాలో నటిస్తున్నారా? అని అడిగితే… ”ఆ చర్చలైతే జరుగుతున్నాయి. ఇంకా నేను కథ కూడా వినలేదు. కథ విన్న తరవాత ఓ నిర్ణయం తీసుకుంటా” అని క్లారిటీ ఇచ్చాడు. మహేష్ బాబు సినిమా అనేసరికి… ఉపేంద్రకు నో చెప్పడానికి పెద్దగా కారణాలు కనిపించకపోవొచ్చు. అయితే విజయశాంతి నటిస్తుందా? లేదా? అనేదే అనుమానం. ఎందుకంటే.. ఆమె రాజకీయాలతో బిజీగా ఉంది. ఈమధ్య కాలంలో విజయశాంతితో రీ ఎంట్రీ చేయించాలని చాలామంది ప్రయత్నించారు. కానీ విజయశాంతి సున్నితంగా తిరస్కరించింది. మరి మహేష్ కోసం తనేమైనా దిగి వస్తుందేమో చూడాలి.
