ఆర్జీవీ చిక్కుల్లో పడ్డారు. ఆయనపై ఉత్తరప్రదేశ్లోని లక్నోలో కేసు నమోదైంది. బీజేపీ రాష్ట్రపతి అభ్యర్థి ద్రౌపది ముర్ముపై ఆయన అనుచిత వ్యాఖ్యలు చేశారని ఆ పార్టీ నేతలు ఫిర్యాదు చేయడంతో పోలీసులు కేసు నమోదు చేశారు. నిజానికి అలాంటి ఫిర్యాదులు తెలుగు రాష్ట్రాల్లోనూ చేశారు. కానీ కేసుల నమోదు వరకూ వెళ్లలేదు. కానీ లక్నోలో పోలీసులు కేసులు పెట్టేశారు. ఆర్టీవీపై ఆషామాషీగా కేసులు పెట్టి ఉండరని.. తర్వాత చర్యలు ఉంటాయన్న చర్చ ప్రారంభమైంది.
యూపీ సీఎం ఆదిత్యనాథ్ కాషాయధారి కావొచ్చు కానీ ఆయన పాలన మొత్తం ” అంతా నా ఇష్టం ” అన్న తరహాలో ఉంటుంది. ఓ వర్గం ఇళ్లను బుల్డోజర్లతో కూల్చివేయడం దగ్గర్నుంచి… రౌడిషీటర్ల పేరుతో కాల్చి చంపడాలు.. ఎన్ కౌంటర్ చేయడాలు లెక్కలేనన్ని జరుగుతూ ఉంటాయి. యూపీలో పరిస్థితులపై అంతటా ఆశ్చర్యం వ్యక్తమవుతూ ఉంటుంది. బీజేపీకి వ్యతిరేకంగా .. .ఏం జరిగినా.. ముఖ్యంగా సెంటిమెంట్ రెచ్చగొట్టేలా ఎలాంటివి చోటు చేసుకున్నా యోగి ప్రభుత్వం ఓ రేంజ్లో స్పందిస్తుంది. ఆర్జీవీపై కేసు విషయంలో తదుపరి చర్యలపై చర్చ అందుకే వస్తోంది.
రామ్ గోపాల్ వర్మ ఇంతకు ముందు పలుమార్లు హిందూ దేవుళ్లను అవమానించారు. ఆయన వ్యాఖ్యలు చాలా సార్లు వైరల్ అయ్యాయి. ఇలాంటివి బీజేపీ నేతలకు ముఖ్యంగా యూపీ సీఎం లాంటి వారికి నచ్చవు. చాన్స్ వస్తే దేవుడి పవర్ చూపించాలనుకుంటారు. ఇప్పుడు ఓ ట్వీట్ ద్వారా ఆర్జీవీ అలాంటి చాన్స్ ఇచ్చినట్లుగా కనిపిస్తోంది. ఆర్జీవీని ఏ క్షణం అయినా అరెస్ట్ చేసి తీసుకుపోయినా ఆశ్చర్యం లేదని కొన్ని వర్గాలు అంచనా వేస్తున్నాయి. అయితే అంత సీరియస్గా తీసుకోరని కొంత మంది అంటున్నారు.
