తెలంగాణ రాష్ట్ర సమితి నేతలు చంద్రబాబు రాజకీయ వ్యూహాలకు భయపడుతున్నారా..?. ఎన్నికల భారం మొత్తం… తెలంగాణ టీడీపీ నేతలకే అప్పగించేసి చంద్రబాబు సైడైపోయారు. కానీ ఈ విషయాన్ని టీఆర్ఎస్ నేతలు నమ్మడం లేదు. చంద్రబాబు ప్రత్యక్షంగా తెలంగాణ ఎన్నికల విషయంలో పట్టించుకోకపోయినా..తెర వెనుక వ్యూహరచన చేస్తున్నారని గట్టిగా నమ్ముతున్నారు. ఈ కోణంలోనే చంద్రబాబుపై ఘాటు విమర్శలు ప్రారంభించారు. టీఆర్ఎస్ ఎంపీ, ప్రస్తుతం చెన్నూరు అభ్యర్థిగా పోటీ చేస్తున్న బాల్క సుమన్… ఏపీ ఇంటలిజెన్స్ అధికారులు.. తెలంగాణలో క్యాంప్ ఏర్పాటు చేసుకోవడానికి కారణం ఏమిటంటూ.. విమర్శలు గుప్పించారు. వందల కోట్లు తెలంగాణకు తరలించారని ఆరోపించారు. తెలంగాణను కలుషితం చేసేందుకు… చంద్రబాబు ఏపీ ఇంటెలిజెన్స్ను వాడుకుంటున్నారని ఆరోపించారు. వేరే రాష్ట్రాల ఇంటెలిజెన్స్ పోలీసులు తెలంగాణలో ఎందుకు తిరుగుతున్నారనేది ఆయనకు వచ్చిన ధర్మసందేహం.
డీజీపీ, గవర్నర్ చర్యలు తీసుకోవాలని సుమన్ డిమాండ్ చేశారు.ఈసీకి కూడా ఫిర్యాదు చేస్తామన్నారు. ఎవరూ చర్యలు తీసుకోకపోతే… తామే ప్రత్యక్షంగా రంగంలోకి దిగుతామని హెచ్చరికలు కూడా చేశారు. అచ్చంగా ఇలాంటి విమర్శలనే.. ఎమ్మెల్సీ పల్లా రాజేశ్వర్ రెడ్డి కూడా చేశారు. చంద్రబాబు డబ్బు సంచులను తెలంగాణ నుంచి విత్ డ్రా చేసుకోకపోతే టీఆర్ఎస్ దళాలు పట్టుకుని చట్టానికి అప్పగిస్తాయని పల్లా రాజేశ్వర్రెడ్డి ప్రకటించారు. కాంగ్రెస్ పార్టీకి ఏపీ నుంచి నిధుల సాయం అందుతుందని… టీఆర్ఎస్ కు కచ్చితమైన సమాచరం వచ్చి ఉంటుందని.. అందుకే.. విమర్శలు ప్రారంభించారన్న అభిప్రాయం టీఆర్ఎస్ వర్గాల్లో వ్యక్తమవుతోంది. కానీ తెలుగుదేశం పార్టీ నేతలు.. మాత్రం.. టీఆర్ఎస్ ఆరోపణల్ని తేలిగ్గా తీసి పడేస్తున్నారు. రాజకీయాల్లో .. అలా చేస్తారేమో అన్న భయంతో.. ముందస్తుగా ఆరోపణలు చేస్తూంటారని..టీఆర్ఎస్ నేతలు అదే వ్యూహాన్ని అమలు చేస్తున్నారంటున్నారు. అంతగా.. ఏపీ నుంచి డబ్బు సంచులు వస్తే.. తెలంగాణ ప్రభుత్వ యంత్రాంగం మొత్తాన్ని చేతుల్లో ఉంచుకుని.. ఎందుకు పట్టుకోలేదని ప్రశ్నిస్తున్నారు.
ఇప్పుడు తెలంగాణలో ఎలాంటి పరిస్థితులు ఉన్నాయో అందరికీ తెలుసని… విపక్ష నేతంలదరి ఫోన్లు ట్యాప్ అవుతున్నాయన్న అనుమానాన్ని టీ టీడీపీ నేతలు వ్యక్తం చేస్తున్నారు. మొత్తానికి…మహాకూటమితో టీఆర్ఎస్ పోటీలో… ప్రధానంగా చంద్రబాబు పేరునే.. గులాబీ నేతుల స్మరిస్తున్నారు. ఆయన వ్యూహాలకు చెక్ పెట్టడానికి ముందస్తు ఆరోపణలు ప్రారంభించారన్న అభిప్రాయం వ్యక్తమవుతోంది.
