చనిపోయిన ప్రజాప్రతినిధుల కుటుంబాల్లోని వారికి ఉపఎన్నికల్లో ఏకగ్రీవం చేసే సంప్రదాయం ఉందని… నాగార్జునసాగర్లోనూ విపక్షాలు అదే పాటించాలని.. టీఆర్ఎస్ నేత.. మండలి చైర్మన్ గుత్తా సుఖేందర్ రెడ్డి అడుగుతున్నారు. నాగార్జునసాగర్ టీఆర్ఎస్ ఎమ్మెల్యే నోముల నర్సింహయ్య చనిపోవడంతో ప్రస్తుతం అక్కడ ఉపఎన్నిక జరగాల్సి ఉంది. ఉపఎన్నిక అంటే.. టీఆర్ఎస్కు ఆందోళన ప్రారంభమయింది. దీంతో… నాగార్జునసాగర్ గండాన్ని ఎలా గట్టెక్కాలన్నదానిపై టీఆర్ఎస్ చర్చోపచర్చలు నిర్వహిస్తోంది. గాల్లో ఓ రాయి వేద్దామన్నట్లుగా ఏకగ్రీవం ప్రస్తావన కూడా తీసుకు వచ్చింది. గుత్తా ప్రతిపాదనపై విపక్ష పార్టీల నేతలే సెటైర్లు వేస్తున్నారు. ఓ సారి.. వెక్కి తిరిగి చూసుకోమని సెటైర్లు వేస్తున్నారు.
ఉమ్మడి రాష్ట్రంలో ఎమ్మెల్యేలు ఎవరైనా చనిపోతే… వారి కుటుంబసభ్యులను ఏకగ్రీవంగా ఎన్నుకునే సంప్రదాయం ఉంది. కానీ తెలంగాణ రాష్ట్రం ఏర్పడిన తర్వాత కేసీఆర్ దాన్ని పట్టించుకోలేదు. కాంగ్రెస్ ఎమ్మెల్యేలు చనిపోయినప్పుడు… కనీసం సానుభూతి కూడా లేకుండా.. తెలంగాణ సెంటిమెంట్తో.. అభ్యర్థుల్ని పోటీ చేయించారు. పాలెరులో వెంకటరెడ్డి… నారాయణఖేఢ్లో పటోళ్ల కృష్ణారెడ్డి కాంగ్రెస్ ఎమ్మెల్యేగా ఉండేవారు. వారు చనిపోవడంతో ఉపఎన్నికలు వచ్చాయి. కానీ కేసీఆర్ ఈ ఏకగ్రీవ సంప్రదాయాన్ని పక్కన పెట్టేశారు తన పార్టీ నేతల్ని పెట్టి… పెద్ద ఎత్తున పార్టీ బలగాలను మోహరించి.. విజయం సాధించారు. పాలేరులో తుమ్మలను గెలిపించారు. ఖేడ్లో భూపాల్ రెడ్డిని గెలిపించారు. సంప్రదాయాలను పాటించాలని అప్పట్లో విపక్ష నేతలు చెప్పినా లెక్క చేయలేదు.
ఇప్పుడు.. టీఆర్ఎస్కు గడ్డు కాలం వచ్చింది. సొంత పార్టీ ఎమ్మెల్యేలు చనిపోతున్నారు. దుబ్బాక లాంటి చోట్లోనే తెలంగాణ సెంటిమెంట్ పని చేయలేదు. ప్రభుత్వ వ్యతిరేకత తీవ్రస్థాయిలో పెరిగింది. అదే సమయంలో ఉపఎన్నికల్లో అధికార పార్టీ అడ్వాంటేజ్.. . పథకాలు కూడా పారడం లేదని.. గ్రేటర్ ఎన్నికల్లో తేలిపోయింది. మరో వైపు.. బీజేపీ ఎదిగిపోతోంది. ఉపఎన్నికల ద్వారా.. ఆ పార్టీకి మరింత అవకాశం కల్పిస్తున్నట్లుగా అవుతోంది. ఇప్పుడు… తనకు అవసరం వచ్చింది కాబట్టి.. టీఆర్ఎస్ … ఏకగ్రీవం.. సంప్రదాయాల్ని బయటకు తెస్తోందన్న విమర్శలు ఎదుర్కొంటోంది.
