అయ్యప్పయుమ్ కోషియమ్ రీమేక్ లో త్రివిక్రమ్ పాత్ర అంతా ఇంతా కాదు. ఈ ప్రాజెక్టు సెట్ అవ్వడానికి కారణం… ఆయనే. ఈ చిత్రానికి మాటలు అందించారు. పవన్ ఇమేజ్కి తగ్గట్టుగా మార్పులూ చేర్పులూ చేశారు. ఈ సినిమా లాభాల్లోనూ ఆయనకు వాటా ఉందని టాక్. పవన్ చేతిలో మరో రీమేక్ పడిందిప్పుడు. సముద్రఖని దర్శకత్వం వహించిన `వినోదయ సీతమ్` చిత్రాన్ని పవన్ కోసం రీమేక్ చేస్తున్నారు. సముద్రఖనినే దర్శకుడు. అయితే ఈ చిత్రానికి త్రివిక్రమ్ సంభాషణలు అందిస్తారని, ఈ సినిమా నిర్మాణంలోనూ వాటా అందుకుంటారని టాక్ వినిపించింది. అయితే… త్రివిక్రమ్ మాత్రం అందుకు సిద్ధంగా లేరని తెలుస్తోంది. ఈ చిత్రానికి మాటలు, స్క్రీన్ ప్లే అందించే బాధ్యత త్రివిక్రమ్ స్వయంగా మరో రచయిత చేతిలో పెట్టడానికి చూస్తున్నట్టు టాక్ వినిపిస్తోంది.
దానికీ ఓ కారణం ఉంది. త్రివిక్రమ్ ఇప్పుడు మహేష్ బాబు సినిమాతో బిజీగా ఉన్నాడు. భీమ్లా నాయక్ వల్లే… మహేష్ సినిమా గురించి పట్టించుకోలేకపోయాడు త్రివిక్రమ్. ఇప్పుడు పవన్ సినిమాలో పడితే, మరో మూడు నాలుగు నెలలు దాని కోసమే సమయం కేటాయించాలి. అందుకే సంభాషణల బాధ్యతలు మరో రచయితకి ఇవ్వాలని త్రివిక్రమ్ అనుకుంటున్నాడట. ప్రస్తుతానికి బుర్రా సాయి మాధవ్ పేరు పరిశీలనలో ఉంది. ఆయనతో చిత్ర బృందం సంప్రదింపులు జరిపినట్టు టాక్. ఈ చిత్రాన్ని జీ 5 సంస్థ నిర్మించబోతోంది.
