వంద కోట్లు, రెండొందల కోట్లు, మూడొందల కోట్ల సినిమాలంటే రాజమౌళినే గుర్తొస్తాడు. ఆ స్థాయిలో ఖర్చు పెట్టికూడా రాబట్టుకోగలిగే దమ్ము ఆయనకు ఉంది. అందుకే రాజమౌళి సినిమా బడ్జెట్ అంతన్నా.. పెద్దగా ఆశ్చర్యపోం. నిజానికి అవకాశం ఇస్తే… త్రివిక్రమ్ కూడా రాజమౌళి కంటే ఘనంగా ఖర్చు పెట్టగలడు. ఈ విషయం త్రివిక్రమ్ ప్రియ మిత్రుడు సునీల్ మాటల్ని బట్టి అర్థమవుతోంది.
సునీల్ – త్రివిక్రమ్ ఇద్దరూ రూమ్మేట్స్ అన్న సంగతి తెలిసిందే. వీరిద్దరూ ఒకే రూమ్లో ఉన్నప్పుడు త్రివిక్రమ్ సునీల్కి బోలెడన్ని కథలు చెప్పాడట. అందులో రూ.500 కోట్ల బడ్జెట్ అవసరమయ్యే భారీ సినిమా కూడా ఉందని సునీల్ గుర్తు చేసుకున్నాడు. ఆ కథ ఇప్పుడు తీయాల్సివస్తే ఏకంగా 2000 కోట్లు అవుతాయని అంటున్నాడు సునీల్. ”త్రివిక్రమ్ అప్పట్లో చాలా కథలు చెప్పేవాడు. అందులో సగం కూడా వాడలేదు. త్రివిక్రమ్ ఇప్పుడున్న స్థానం చాలా తక్కువ. నేనైతే తాను ఇంకా ఎత్తుకు ఎదుగుతాడని ఊహించాను. ఒకట్రెండు సినిమాలు తీసిన తరవాత బాలీవుడ్ కి వెళ్లిపోతాడనుకున్నాను. తన స్థాయి అలాంటిది” అని చెప్పుకొచ్చాడు సునీల్.
