ఓ భారీ అంచనాలతో వస్తున్న సినిమా గురించి చిన్న అప్డేట్ కోసం వేయి కళ్లతో ఎదురుచూస్తారు ప్రేక్షకులు. మాటల మాత్రికుడు త్రివిక్రం చేస్తున్న సినిమా గురించైతే అభిరుచి గల ప్రేక్షకులందరు వెయిట్ చేస్తుంటారు. ప్రస్తుతం ‘అఆ’ సినిమా పోస్టర్ అంటూ ఓ ఫోటో నెట్ లో హల్ చల్ చేస్తుంది. అయితే అది మార్ఫింగ్ అని తెలుస్తుంది.
శింభు, ఆండ్రియా నటించిన ‘ఇదు నమ్మ ఆలు’ సినిమాలో ఓ స్టిల్ ను యాజిటీజ్ దించేసి నితిన్ సమంతలతో డిజైన్ చేశారు కొందరు. అయితే అది నిజంగానే త్రివిక్రం ‘అఆ’ సినిమాకు సంబంధించినదని భావనలో ఉండగా అది తమ సినిమాలోది కాదని వివరణ ఇచ్చింది చిత్ర యూనిట్. ఎవరో మార్ఫింగ్ చేసి పెట్టారు తప్పా ఆ ఫోటోకి ‘అఆ’కు సంబంధం లేదని అసలు అది తమ సినిమాకు కాదని డిక్లేర్ చేశారు.
అయితే కొంతమంది మాత్రం ఆ మార్ఫింగ్ ఫోటోని చూసి భలే ఎంజాయ్ చేస్తున్నారు. నితిన్ సమంత జంటగా నటిస్తున్న ఈ సినిమాలో అనుపమ పరమేశ్వరన్ కూడా ఓ ప్రత్యేక పాత్రలో నటిస్తుంది. హారిక అండ్ హాసిని క్రియేషన్స్ పతాకంలో రాధాకృష్ణ ఈ సినిమాను నిర్మిస్తున్నారు. మార్చ్ చివరలో ఆడియో రిలీజ్ చేసుకోబోతున్న ఈ సినిమా ఏప్రిల్ 22న రిలీజ్ చేసేలా ప్లాన్ చేస్తున్నారు.
