టాలీవుడ్ ఓ కొత్త హీరోయిన్ వచ్చిందంటే – చూపంతా అటువైపుకి వెళ్లిపోతుంది. ఎందుకంటే.. అసలే మనకు హీరోయిన్ల కొరత. కాస్త ప్రతిభుంటే చాలు. తరువాతి సినిమాలో పెట్టేసుకోవొచ్చన్నది నిర్మాతల ఆత్రం. ఉప్పెన తరవాత కృతి శెట్టి జీవితం మొత్తం మారిపోయింది. ఒకే ఒక్క హిట్.. ఆమెని స్టార్ హీరోయిన్ల పక్కన నిలబెట్టింది. ఇప్పుడు శ్రీలీల పరిస్థితీ అంతే.
పెళ్లి సందడి సినిమాతో తెరంగేట్రం చేసింది శ్రీలీల. గతవారం విడుదలైన ఈ సినిమాకి దారుణమైన రివ్యూలొచ్చాయి. కాకపోతే వసూళ్ల పరంగా కాస్త మెరుగ్గా ఉంది. దానికి తోడు శ్రీలీలకు మంచి మార్కులు పడ్డాయి. కాస్త బొద్దుగా, చూడగానే ఆకట్టుకునేలా ఉంది శ్రీలీల. పైగా డాన్సుల్లో ఈజ్ చూస్తే మతి పోయింది. రాఘవేంద్రరావు ఫ్రేమ్ లో… శ్రీలీల మరింత అందంగా కనిపించింది. నిజానికి ఈసినిమా విడుదలకు ముందే.. శ్రీలీల దృష్టి టాలీవుడ్ పై పడింది. రవితేజ సినిమాలో శ్రీలీల హీరోయిన్ గా ఫిక్సయ్యింది. ఇప్పుడు రిలీజ్ అయ్యాక.. మరిన్ని అవకాశాలు వరుస కడుతున్నాయి. శర్వా, నితిన్, నిఖిల్, సాయిధరమ్ తేజ్.. ఇలాంటి యంగ్ బ్యాచ్ పక్కన శ్రీలీల అయితే బాగుంటుందని నిర్మాతలు భావిస్తున్నారు. కొత్త హీరోలకైతే తను మంచి ఆప్షనే. ఇప్పటికి తన చేతిలో నాలుగు సినిమాలున్నాయని తెలుస్తోంది. కొత్తగా మరో రెండు ఆఫర్లూ వచ్చాయట.చూస్తుంటే… శ్రీలీల ఇండ్రస్ట్రీలో కొన్నాళ్లు పాతుకుపోయేలానే కనిపిస్తోంది.
