గతవారం విడుదలైన సినిమా ‘టిల్లు స్క్వేర్’. సిద్దు జొన్నలగడ్డకు యూత్ లో ఫాలోయింగ్ ఏర్పడడం, పాజిటీవ్ టాక్ రావడంతో.. మంచి వసూళ్లని అందుకొంది. ఈవారం ‘ఫ్యామిలీ స్టార్’ సినిమా ఉండడంతో ‘టిల్లు’ దూకుడుకు కళ్లెం పడడం ఖాయం అనుకొన్నారంతా. నిజంగానే ‘ఫ్యామిలీ స్టార్’ బాగుంటే ‘టిల్లు’ రన్ ఆగిపోయేది. కానీ విజయ్ సినిమాకు నెగిటీవ్ టాక్ రావడంతో ‘టిల్లు’ దూకుడు ఈవారంతం కూడా కొనసాగబోతోంది.
శుక్రవారం ‘ఫ్యామిలీ స్టార్’ సినిమా విడుదలైనా టిల్లుకి సైతం మంచి వసూళ్లే దక్కాయి. ‘ఫ్యామిలీ స్టార్’ నెగిటీవ్ రిపోర్ట్ తో.. ‘టిల్లు’ శని, ఆది వారాలు సైతం తన దూకుడు కొనసాగించే అవకాశం ఉంది. దానికి తోడు… చిత్రబృందం కూడా మరో దఫా ప్రమోషన్లను మొదలెట్టింది. తొలి వారంలో దాదాపు రూ.90 కోట్లు వసూలు చేసింది టిల్లు. ‘ఫ్యామిలీస్టార్’ పుణ్యమా అని.. ఇప్పుడు వంద కోట్ల మార్క్ ని అవలీలగా చేరుకోవడం ఖాయం. ఈవారమే మలయాళం సినిమా ‘మంజుమ్మల్ బోయ్స్’ విడుదలైంది. ఆ సినిమాకు సైతం మంచి రివ్యూలు అందుతున్నాయి. ఆల్రెడీ మలయాళంలో పెద్ద హిట్. కాబట్టి తెలుగులోనూ ప్రేక్షకుల చూపు తనవైపు తిప్పుకొంది. ‘ఫ్యామిలీ స్టార్’ వైఫల్యం ఈ రెండు సినిమాలకూ బాగా కలిసి రానుంది.
