మ‌హేష్‌బాబు – రాజ‌మౌళి కాంబినేష‌న్‌లో ఓ చిత్రం రూపుదిద్దుకొంటున్న సంగ‌తి తెలిసిందే. స్క్రిప్టు వ‌ర్క్ దాదాపుగా ఓ కొలిక్కి వ‌చ్చింది. త్వ‌ర‌లోనే రాజ‌మౌళి వ‌ర్క్ షాపులు ప్రారంభించ‌నున్నారు. ఈ వర్క్ షాపుల్లోనే మ‌హేష్ లుక్ ఎలా ఉండాలి? మిగిలిన క్యారెక్ట‌ర్లేమిటి? అనే విష‌యాల్లో ఓ స్ప‌ష్ట‌త వ‌స్తుంది. అయితే ఈ సినిమాలో ముగ్గురు బాలీవుడ్ హీరోల‌కు స్థానం ఇచ్చిన‌ట్టు తెలుస్తోంది. వాళ్లంతా వివిధ పాత్ర‌ల్లో క‌నిపించ‌నున్నార్ట‌. బ‌డ్జెట్ ప‌రంగానూ, కాస్టింగ్ ప‌రంగానూ ఆర్.ఆర్‌.ఆర్‌ని మించిపోయే స్థాయిలో ఈ చిత్రాన్ని నిల‌బెట్టాల‌న్న‌ది రాజ‌మౌళి వ్యూహం. దాదాపు రూ.1500 కోట్లు ఈ సినిమాపై పెట్టుబ‌డి పెట్ట‌నున్నారు. ఆ లెక్క‌న ఇండియ‌న్ సినిమాల్లో అత్యంత ఖ‌రీదైన ప్రాజెక్ట్ ఇదే. ఈ సినిమాలో క‌నిపించే ఆ ముగ్గురు బాలీవుడ్ హీరోలెవ‌రు అనేదానిపై ప్రస్తుతం క‌స‌ర‌త్తు జ‌రుగుతోంది. రాజ‌మౌళి అడిగితే.. ఎంత పెద్ద స్టార్ అయినా, ఎస్ చెప్పాల్సిందే. కాబ‌ట్టి.. రాజమౌళి మైండ్ లో ఓ హీరో ఫిక్స‌యితే చాలు. వాళ్లంతా ఈ సినిమాలో న‌టించ‌డానికి సిద్ధంగానే ఉంటారు. మ‌రి ఆ ముగ్గురు ఎవ‌రన్న‌ది త్వ‌ర‌లో తెలుస్తుంది.