అక్టోబరు 2న ‘సైరా’ విడుదలకు సిద్ధమైంది. చిరంజీవి సినిమా, అందులోనూ పాన్ ఇండియా క్రేజ్ తో విడుదల అవుతోంది. ఇలాంటప్పుడు మిగిలిన సినిమాలు సైడ్ ఇవ్వడం మామూలే. ఓ వైపు చిరంజీవి పోస్టర్ పడినప్పుడు – మరో సినిమా విడుదలకు రెడీ అవ్వడం నిజంగా సాహసమే. కానీ ‘చాణక్య’ మాత్రం అవేం పట్టించుకోవడం లేదు. అక్టోబరు5న విడుదల అవ్వడానికి సమాయాత్తం అవుతోంది. గోపీచంద్కి ఈమధ్య సరైన సినిమాల్లేవు. రిలీజ్ డేట్ విషయంలో తప్పు చేస్తే.. అడ్డంగా దొరికిపోతాడు. కాకపోతే.. ఇది పండగ సీజన్. ‘సైరా’తో పాటు మరే సినిమా వచ్చినా, దానికి రావల్సిన ఆదరణ దానికి ఉంటుందని నమ్ముతూ ‘చాణక్య’ని రెడీ చేస్తున్నారు. కానీ.. ఈ సినిమాకి తగిన సంఖ్యలో థియేటర్లు దొరుకుతాయా, లేదా? అనేది అనుమానంగా మారింది.
బుధవారం ‘సైరా’ విడుదల అవుతోంది. అది ఆడ్ డేనే. గురు, శుక్ర వారాలకు సైరా హవా కొద్దిగా తగ్గొచ్చు. ఎక్కువ థియేటర్లలో సినిమా విడుదల చేస్తారు కాబట్టి, రెండో రోజుకే ఆ సందడి తగ్గుతుంది. అందుకే చాణక్య సైలెంట్గా శనివారం వస్తున్నాడు. ఈ విషయంలో నిర్మాతల లెక్కలు నిర్మాతలవి. అయితే… థియేటర్ యజమానులకు మాత్రం ఓ నిర్మాత ఫోన్ చేసి ‘చాణక్యకు థియేటర్లు ఇవ్వొద్దు’ అని బెదిరిస్తున్నాడని ఇండ్రస్ట్రీ వర్గాల టాక్. ‘సైరా’ బాహుబలి రికార్డుల్ని బద్దలు కొట్టాలన్న ధ్యేయంతో వస్తోందని, పండగ అయ్యేంత వరకూ అదే సినిమా ఆడాలని.. అలా జరగాలంటే – ‘చాణక్య’కు థియేటర్లు ఇవ్వకూడదని.. గట్టిగా చెబుతున్నాడట. ఆ నిర్మాత మెగా కుటుంబానికి అత్యంత సన్నిహితుడు. ఆయన చేతిలో కొన్ని థియేటర్లు కూడా ఉన్నాయి. పరిశ్రమలో కాస్తపలుకుబడి ఉన్న వ్యక్తి కాబట్టి ఆయన మాటకు ఎవరైనా విలువ ఇస్తారు. అందుకే… చాణక్యకు థియేటర్లు ఇచ్చినవాళ్లు ఇప్పుడు కాస్త ఆలోచనలో పడినట్టు తెలుస్తోంది.
పెద్ద సినిమాలు వస్తున్నప్పుడు – అందులోనూ సైరా లాంటి ప్రతిష్టాత్మక సినిమాలు వస్తున్నప్పుడు మిగిలిన సినిమాలు కాస్త దారిస్తాయి. కనీసం వారం రోజుల గ్యాప్ ఉండేలా చూస్తాయి. సాహో విషయంలోనూ ఇదే జరిగింది. కానీ.. సైరాకు మాత్రం కొన్ని సినిమాలు భయపడడం లేదు. అందులో చాణక్య ఒకటి. ‘చాణక్య’ సైరాకి అడ్డు కాదు. కాకపోతే… పండగ సీజన్లో ‘సైరా’ ఒక్కటే ఉంటే అడ్వాంటేజ్ దొరుకుతుంది. సినిమా ఎలా ఉన్నా, జనాలు చూస్తారన్న నమ్మకం ఉంటుంది. కానీ పరిస్థితులు తలకిందులై… ‘సైరా’ ఉధృతి ఓ రేంజులో ఉంటే.. ‘చాణక్య’ విడుదల అవ్వడానికి కాస్త ఆలోచించుకోవాల్సిందే. ఈలోపు ఇలాంటి బెదిరింపులు వాళ్లకి కాస్త జంకేలా చేస్తుంటాయి. మరి.. ‘సైరా’ని ఢీ కొట్టాలనుకున్న ‘చాణిక్యు’డి పరిస్థితి ఏమవుతుందో..?
