వైఎస్ వివేకా హత్య కేసులో అవినాష్ రెడ్డి దాఖలు చేసుకున్న ముందస్తు బెయిల్ పిటిషన్ పై విచారణను తెలంగాణ హైకోర్టు శుక్రవారానికి వాయిదా వేసింది. అవినాష్ రెడ్డి పిటిషన్ 70 వ నెంబర్ తర్వాత రిజిస్టర్ కావడంతో.. సాయంత్రం వరకూ విచారణకు రాలేదు. విచారణకు వచ్చిన తర్వాత వాదనలకు ఎంత సమయం పడుతుందని ఇరు వర్గాల న్యాయవాదుల్ని న్యాయమూర్తి ప్రశ్నించారు. తమకు గంట సమయం కావాలని సీబీఐ తరపు న్యాయవాదులు ధర్మాసనానికి వివరించారు. దీంతో శుక్రవారం ఉదయం పదిన్నరకు వాదనలు వింటామని హైకోర్టు తెలిపింది. వాయిదా వేసింది. శుక్రవాదం ఉదయం పదిన్నరకు వాదనలు జరగనున్నాయి.
మరో వైపు అవినాష్ రెడ్డి తల్లి శ్రీలక్ష్మి ఆరోగ్య పరిస్థితి కుదుట పడిందని కర్నూలు విశ్వభారతి ఆస్పత్రి వైద్యులు హెల్త్ బులెటిన్ విడుదల చేశారు. శ్రీలక్ష్మి ఆరోగ్య పరిస్థితిలో పురోగతి ఉందని వైద్యులు తెలిపారు. వాంతులు తగ్గాయని .. ఐసీయూ నుంచి సాధారణ గదికి తరలించడానికి ప్లాన్ చేస్తున్నామని హెల్త్ బులెటిన్లో తెలిపారు. ఆరు రోజుల నుంచి అవినాష్ రెడ్డి తల్లి విశ్వభారతి ఆస్పత్రిలో చికిత్స పొందుతున్నారు. వైఎస్ అవినాష్ రెడ్డి కూడా ఆస్పత్రిలోనే ఉన్నారు. బయటకు రావడం లేదు.
శుక్రవారం ఉదయం అవినాష్ రెడ్డి బెయిల్ పిటిషన్ పై హైకోర్టు నిర్ణయం తర్వాత ఆయన తల్లిని డిశ్చార్జ్ చేయాలా లేకపోతే ఇంకా పది రోజుల పాటు చికిత్సచేయాలా అన్నదానిపై వైద్యులు నిర్ణయం తీసుకునే అవకాశం ఉంది. సుప్రీంకోర్టు ఆదేశాల మేరకు ఈ రోజు హైకోర్టు నిర్ణయం తీసుకుంటుందని అనుకున్నారు. హైకోర్టు నిర్ణయాన్ని బట్టి సీబీఐ చర్యలు ఉంటాయన్న ప్రచారంతో అంతా అలర్ట్ అయ్యారు. కానీ కోర్టు సమయం ముగిసే ముందు పిటిషన్ విచారణకు రావడంతో.. మరో రోజుకు ఎదురుచూపులు తప్పలేదు.
