స్పోర్ట్స్ డ్రామా అంటే మ‌న‌కు క్రికెట్టో, హాకీనో గుర్తొస్తుంది. మ‌హా అయితే కుస్తీ.. ఎందుకంటే.. అలాంటి ఆట‌ల‌తోనే మ‌నం ఎక్కువ‌గా రిలేట్ అయ్యాం. ఇప్పుడొస్తున్న స్పోర్ట్స్ డ్రామాల‌న్నీ వీటి చుట్టూనే ఎక్కువ‌గా తిరుగుతున్నాయి. అయితే… మ‌డ్డీ రేసింగ్ గురించి ఎవ‌రూ పెద్ద‌గా ఆలోచించలేదు. ఆఫ్ రోడ్ రేసింగ్‌లలో మ‌డ్డీ రేసింగ్ కి ప్ర‌త్యేక‌మైన స్థానం ఉంది. దీని చుట్టూ ఓ సినిమా తీశారు. అదే.. ‘మ‌డ్డీ’. బుర‌ద‌లో కారు రేసింగ్ అన్న‌మాట‌. ప్ర‌గ‌ల్ భ‌ల్ ఈ చిత్రానికి ద‌ర్శ‌కుడు. ప్ర‌గ‌ల్ భ‌ల్ కి చిన్న‌ప్ప‌టి నుంచీ రేసింగ్ అంటే చాలా ఆస‌క్తి. ఈ క‌థ‌పై ఆయ‌న ఐదేళ్లు రీసెర్చ్ చేశారు. లొకేష‌న్ ని ఎంచుకోవ‌డానికే దాదాపు యేడాది కేటాయించార్ట‌. ఇప్ప‌టి వ‌ర‌కూ ఇలాంటి నేప‌థ్యంలో సినిమా రాలేద‌ని, దేశంలో తొలిసారి ఆ ఘ‌న‌త `మ‌డ్డీ`కి ద‌క్కింద‌ని ద‌ర్శ‌కుడు చెబుతున్నాడు. హాలీవుడ్ సాంకేతిక నిపుణులు ఈ చిత్రానికి ప‌ని చేశారు. కాక‌పోతే న‌టీన‌టులంతా కొత్త‌వారే. ఈ సినిమాకి సంబంధించిన మోష‌న్ పోస్ట‌ర్ ని ఈ రోజు విడుద‌ల చేశారు. మోష‌న్ పోస్ట‌ర్ చూస్తే.. ఓ టీజ‌ర్ చూసిన ఫీలింగ్ క‌లుగుతుంది. క‌చ్చితంగా ఇదే విభిన్న‌మైన స్పోర్ట్స్ డ్రామాగా నిలుస్తుంద‌న్న భ‌రోసా క‌లుగుతోంది. త్వ‌ర‌లోనే టీజ‌ర్‌ని విడుద‌ల చేసి, రిలీజ్ డేట్ ఫిక్స్ చేయ‌బోతున్నారు నిర్మాత‌లు.